Biełaruskaha dobraachvotnika Łachviča pabryli nałysa i źniali prynižalnaje «pakajalnaje» videa. Što viadoma

Na staronkach biełaruskaha dobraachvotnika Alaksandra «Łachviča» Naŭkoviča ŭ sacsietkach źjaviłasia dziŭnaje videa.

Na im Łachvič — užo biez svaich paznavalnych vusoŭ i barady — havoryć u kamieru «pakajalny» manałoh. Jon kaža, što vusy byli «adznakaj šlachty», a sam jon svaimi ŭčynkami nibyta pakazaŭ, što hetaj šlachietnaści nie varty. Dalej idzie sieryja abraźlivych frazaŭ pra samoha siabie, a taksama pra inšaha biełaruskaha dobraachvotnika — Alaksandra «Žerara» Krasoŭskaha, jaki ciapier znachodzicca ŭ SIZA va Ukrainie.

Ton videa nastolki prynižalny, a farmuloŭki nastolki nie padobnyja da zvyčajnaj publičnaj kamunikacyi Łachviča, što ŭ vieteranskaj i dobraachvotnickaj supolnaści adrazu zahavaryli: heta vynik cisku. I pačali šukać inicyjatara. 

Chto taki Łachvič

Alaksandr «Łachvič» Naŭkovič — adzin z paznavalnych biełaruskich dobraachvotnikaŭ va Ukrainie, były žaŭnier bataljona «Litvin» Pałka Kalinoŭskaha.

Jon rehularna źjaŭlaŭsia ŭ publičnaj prastory jak błohier, dobraachvotnik i ŭdzielnik palityčnych dyskusij. Jon kamientavaŭ vajnu, biełaruskuju apazicyju, Kaardynacyjnuju radu, pierśpiektyvy vyzvaleńnia Biełarusi i rolu dobraachvotnikaŭ u budučych pieramienach. U svaich intervju i videa Łachvič časta kazaŭ pra biełaruskuju historyju, VKŁ, nacyjanalnuju hodnaść i šlachiecki kodeks pavodzinaŭ.

U 2024 hodzie Naŭkovič abraŭsia ŭ Kaardynacyjnuju radu. Jon naležaŭ da taho kryła dobraachvotnikaŭ, jakoje rehularna krytykavała biełaruskija demakratyčnyja siły za adsutnaść vyraznaj siłavoj stratehii i za adarvanaść ad ludziej sa zbrojaj.

Što kažuć u dobraachvotnickim asiarodździ

Bajcy Pałka Kalinoŭskaha śćviardžajuć, što paśla źjaŭleńnia rolika Łachvič nie adkazvaŭ na zvanki pabracimaŭ. Paźniej jaho znajšli, ź im «usio dobra». Publična kamientavać situacyju jon admaŭlajecca.

Naš surazmoŭca ź liku bajcoŭ ličyć, što pa stylistycy prynižeńnia za videa moža stajać Radzivon «Hiena» Batulin — były kamandzir bataljona «Teror». Takuju zdahadku vykazali i ŭ kamientarach da videa ŭ fejsbuku. 

Surazmoŭca tłumačyć svaju viersiju tym, što, pavodle jaho, Batulin raniej užo prymušaŭ asobnych bajcoŭ halić vusy, bo jany nibyta «nie šlachta». Akramia taho, mienavita z asiarodździa Batulina apošnim časam išli najbolš žorstkija abvinavačańni ŭ bok Žerara.

Źjaŭleńnie videa papiaredžvaŭ kanflikt: nibyta napiaredadni Łachvič apublikavaŭ rolik, u jakim krytykavaŭ Batulina. Sens toj krytyki byŭ u tym, što «kali inšyja vajujuć, a ty jedzieš u Adesu adciskać u mirnych vałanciorku — heta nie šlachietna», a taksama što «kali Žerar siadzić i nie moža adkazać na plotki — heta taksama nie šlachietna».

Pavodle surazmoŭcaŭ, mienavita hetaja publičnaja krytyka vyklikała rezkuju reakcyju ŭ kole ludziej, blizkich da Batulina. Paśla hetaha ŭ sacyjalnych sietkach pačali źjaŭlacca kamientary, dzie słovy Łachviča nazyvali abraźlivymi i niedapuščalnymi.

Chto taki Radzivon Batulin

Radzivon «Hiena» Batulin — fihura z doŭhaj i kanfliktnaj historyjaj u biełaruskim dobraachvotnickim ruchu. Jon byŭ adnym z publičnych pradstaŭnikoŭ bataljona «Teror», a paźniej staŭ adnym z zasnavalnikaŭ Biełaruskaha dobraachvotnickaha korpusa (BDK) razam ź Iharam «Janki» Jankovym i Andrejem «Biaśśmiarotnym» Traceŭskim. Mienavita hetyja troje ŭ śniežni 2022 hoda zapisali videazvarot pra stvareńnie novaha biełaruskaha vajskovaha farmavańnia va Ukrainie.

Pry hetym sam «Teror» naradziŭsia ŭnutry Pałka Kastusia Kalinoŭskaha, ale ŭžo letam 2022 hoda vyjšaŭ ź jaho składu paśla ŭnutranaha kanfliktu. Paśla hetaha padraździaleńnie dziejničała asobna, a zatym uvajšło ŭ BDK.

Viadoma pra suviaź Batulina z ultrapravym asiarodździem. Jašče da poŭnamaštabnaj vajny jon byŭ blizki da Siarhieja «Bocmana» Karotkich.

U intervju i vystupach Batulin časta vykarystoŭvaje leksiku pra «novuju šlachtu», nacyjanalizm, elitarnaść vajaroŭ i asablivy kodeks honaru. 

• 4
• 0
• 1
• 15
• 1
• 0
• 5
• 0