Dobraachvotnik Łachvič paćvierdziŭ, što zapisaŭ «pakajannaje» videa paholenym nałysa paśla sustrečy z Batulinym
Historyja z «pakajannym» videa biełaruskaha dobraachvotnika Alaksandra «Łachviča» Naŭkoviča atrymała praciah.
Paśla taho jak rolik vyklikaŭ rezanans, Łachvič apublikavaŭ jašče adno videa, u jakim faktyčna paćvierdziŭ: zapis «pakajannaha» zvarotu staŭ vynikam jahonaha kanfliktu ź inšym biełaruskim dobrachvotnikam Radyjonam «Hienam» Batulinym.
Pavodle słoŭ Łachviča, paśla publičnaj krytyki Batulina jany sustrelisia asabista.
«Z čaho ŭsio pačałosia: Hiena zhadaŭ mianie ŭ svaim storyz, ja žorstka jamu adkazaŭ, pierahnuŭ. Učora vypadkova my ź im pabačylisia, mnie patłumačyli papularna, što tak nielha. Ja paprasiŭ prabačeńnia, hetaha było niedastatkova. Zaprapanavali niekalki varyjantaŭ», — skazaŭ Łachvič.
Paśla hetaha źjaviłasia videa, dzie dobraachvotnik paholeny. Łachvič śćviardžaje, što paśla jany z Batulinym «pacisnuli adzin adnamu ruki i razyšlisia».
Napiaredadni Łachvič apublikavaŭ u svaim fejsbuku videa, dzie zhadaŭ niekalki starych historyj, źviazanych z Batulinym. Jon zhadaŭ padziei ŭ Adesie ŭ 2022 hodzie, a taksama historyju sa źbićciom byłoha dobraachvotnika PKK z pazyŭnym «Nazhuł». Takija pavodziny Łachvič nazvaŭ «niešlachietnymi».
Mienavita paśla hetaha, pavodle našych krynic, i pačaŭsia kanflikt.
U asiarodździ biełaruskich dobraachvotnikaŭ adrazu źjaviłasia viersija, što reakcyja na słovy Łachviča była vielmi žorstkaj, a jahonaje nastupnaje «pakajannaje» videa stała vynikam asabistaj razmovy ź ludźmi z koła Batulina.
«Pakajanny» rolik vyklikaŭ rezanans. Na im Łachvič biez svaich znakamitych vusoŭ nazyvaŭ siabie «śvinapasam», kazaŭ, što vusy — heta «adznaka šlachty», a jon svaimi ŭčynkami nibyta nie zasłužyŭ prava ich nasić.
Dalej išoŭ šerah samaprynižalnych vykazvańniaŭ, a taksama napady na Alaksandra «Žerara» Krasoŭskaha, jaki ciapier znachodzicca ŭ SIZA va Ukrainie.
Kamientary
[Zredahavana]