U Japonii na čatyroch ludziej napaŭ nadzvyčaj kiemlivy miadźviedź

U japonskaj prefiektury Fukusima praciahvajucca pošuki miadźviedzia, jaki napaŭ na čatyroch čałaviek i ździviŭ ułady svajoj niezvyčajnaj kiemlivaściu, paviedamlaje The Mirror.

Zdymak ilustracyjny. Fota: vecteezy.com

Spačatku drapiežnik atakavaŭ rabotnika na parkoŭcy adnaho z pradpryjemstvaŭ. Mužčynu ŭdałosia vyratavacca tolki dziakujučy kiroŭcu aŭtamabila, jaki adhaniaŭ miadźviedzia mašynaj. Zatym žyviolina zabiehła ŭ susiedni ofisny budynak, dzie napała jašče na adnaho čałavieka, a paśla paraniła jašče dvuch.

Paźniej miadźviedź pranik na zavod elektroniki. Pavodle śviedčańniaŭ rabotnikaŭ, jon samastojna adkryŭ kran i piŭ ź jaho vadu.

Dla adłovu žyvioliny byli zadziejničany śpiecyjalnyja słužby, jakija vykarystoŭvali strelby sa snatvornym. Kala ŭvachodaŭ pastavili pastki, ale miadźviedź zdoleŭ paźbiehnuć ich. Jak paviedamlajecca, jon samastojna adkryŭ zamknionaje akno i ŭciok z budynka.

Pradstaŭniki miascovych uład adznačyli, što ŭ žyviolinu trapiŭ trankvilizatar, adnak pa nieviadomaj pryčynie preparat nie padziejničaŭ. Mer horada Juki Baba nazvaŭ miadźviedzia nadzvyčaj razumnym, źviarnuŭšy ŭvahu na jaho zdolnaść karystacca kranam i adčyniać akno.

Da pošukaŭ dałučylisia palicyja, palaŭničyja, dziaržaŭnyja słužby i apieratary dronaŭ. Pakul što znajści žyviolinu nie ŭdałosia.

Z-za pahrozy napadaŭ škoły ŭ rajonie časova zakryvalisia, ale ciapier adnavili pracu z dadatkovymi mierami biaśpieki.

Pavodle japonskich ŚMI, za apošni hod u krainie ad napadaŭ miadźviedziaŭ zahinuli 13 čałaviek, a kolkaść surjoznych incydentaŭ dasiahnuła rekordnaha ŭzroŭniu. Śpiecyjalisty źviazvajuć heta sa źmianieńniem klimatu, niedachopam kormu ŭ dzikaj pryrodzie i skaračeńniem nasielnictva ŭ sielskaj miascovaści. U suviazi z hetym Japonija navat źmianiła zakanadaŭstva, dazvoliŭšy ŭ asobnych nadzvyčajnych vypadkach vykarystoŭvać ahniastrelnuju zbroju suprać miadźviedziaŭ u nasielenych punktach.

Kamientary da artykuła