Biełaruskaja režysiorka pieramahła z karotkamietražkaj na Krakaŭskim kinafiestyvali
Biełaruskaja fatohrafka i studentka Varšaŭskaj kinaškoły pakazała historyju dziaŭčyny, jakaja niečakana zaciažarała i sprabuje prymać rašeńni samastojna. Stužku mohuć naminavać na «Oskar» i Jeŭrapiejskuju kinapremiju, piša «Biełsat».
Kadr ź filmu «Usich zvali Anželika» (režysiorka Saša Kucień). Skrynšot: Szkolafilmowa.pl
Karotkamietražny film «Usich zvali Anžalika» (Wszystkie miały na imię Anżelika) biełaruskaj režysiorki Sašy Kucień atrymaŭ «Załatoha lajkonika» — pryz za najlepšy karotkamietražny film 66‑ha Krakaŭskaha kinafiestyvalu.
Stužka raskazvaje pra majstarku manikiuru Anžaliku, jakaja sprabuje viarnucca da navučańnia na jurydyčnym fakultecie, ale daviedvajecca pra niezapłanavanuju ciažarnaść. U atačeńni klijentak, marskich śvinak i bota sa štučnym intelektam jana šukaje sens i ŭłasny hołas, kab pryniać pastanovu ŭ śviecie, pierapoŭnienym čužymi mierkavańniami.
Alaksandra (Saša) Kucień — studentka treciaha kursu režysiorskaha fakulteta ŭ Varšaŭskaj kinaškole. «Usich zvali Anžalika» — jaje druhi film i «apošni prypynak» pierad dypłomnaju rabotaj. Alaksandra naradziłasia ŭ Biełarusi, zajmałasia fota, kałažami i animacyjaj, apošnija hady zdymała karotkamietražnyja filmy i muzyčnyja klipy, ładziła vystavy ŭ Polščy i Biełarusi
Minuły jaje film «Niaŭdačnik» (Przegryw) pakazvali na šerahu kinafiestyvalaŭ, a na češskim Mlada Kamera jon atrymaŭ uznaharodu za najlepšy fikšn ad tvorcy da 30 hadoŭ.
Krakaŭski kinafiestyval — važnaje miesca dla karotkamietražnaha kino ŭ Polščy. Pieramoha na im daje mahčymaść naminavać stužku na «Oskar» i Jeŭrapiejskuju kinapremiju.
Čytajcie taksama:
Hałoŭnaja redaktarka «Biełsata» źniałasia ŭ filmie-favarycie Kanskaha kinafiestyvala