Hałoŭnaja redaktarka «Biełsata» źniałasia ŭ filmie-favarycie Kanskaha kinafiestyvala

«Baćkaŭščyna» — čorna-bieły niamieckamoŭny polska-niamiecka-italjanska-francuzski bijahrafičny film, jaki raskazvaje pra viartańnie słavutaha antyfašysta, uładalnika Nobiela pa litaratury Tomasa Mana i jano dački žurnalistki Eryki ŭ zrujnavanuju Hiermaniju paśla Druhoj suśvietnaj vajny, piša «Biełsat».

Jak heta — pahladzieć u vočy ajčynie, jakaja stała monstram i atrymała parazu? 

Krytyki ŭ zachapleńni ad filmu. Pavodle ahrehataru Rotten Tomatoes, film maje 95% rejtynhu «śviežaści» — heta vielmi vysoki pakaźnik, jaki značyć, što film spadabaŭsia amal usim krytykam. Siaredniaja acenka, pavodle Metacritic, 9 z 10.

U centry siužetu padarožža praź Niamieččynu łaŭreata Nobeleŭskaj premii ŭ litaratury Tomasa Mana i jahonaj dački Eryki paśla 16 hadoŭ u vyhnańni. Ich roli vykanali Hans Cyšler (Hans sa śpiłbierhaŭskaha «Miunchiena») i Sandra Chiuler (Eva ź niadaŭniaha «Prajektu Ave Maryja», a taksama hałoŭnaja hierainia ŭ «Anatomii padzieńnia» i «Zonie kamfortu»).

U epizadyčnaj roli ŭ filmie źniałasia hałoŭnaja redaktarka «Biełsatu» Alina Koŭšyk. Jana raskazvaje, što pabačyła abviestku ab kastynhu: šukali ludziej peŭnaj źniešnaści, jakija ŭmiejuć tančyć. Vysłała zajaŭku — i atrymała SMS: «Spadar režysior Paŭlikoŭski adabraŭ Vas na hetuju rolu, zaprašajem na zdymki».

Zdymki epizodu tryvali try dni, adbyvalisia ŭ varšaŭskim Pałacy kultury i navuki.

Alina Koŭšyk raskazvaje: «Maja hałoŭnaja matyvacyja była ŭ tym, kab pahladzieć, jak stvarajecca vialikaje kino vybitnymi režysiorami. Heta vielmi šmatpaviarchovy, dobra zarhanizavany praces. Režysior vielmi patrabavalny da kožnaha kadru, jaki pierazdymajecca niekalki razoŭ z zaanhažavańniem vialikaj kolkaści ludziej».

Pavialičyć

Na zdymačnaj placoŭcy jana paznajomiłasia z amierykanskim aktoram, ź jakim hrała ŭ epizodzie, i bačyła na placoŭcy niekatorych biełarusaŭ.

Cełaha filmu Alina Koŭšyk jašče nie bačyła: pakul była tolki premjera ŭ Kanach. Ale spadziajecca pahladzieć nieŭzabavie.

«Ja liču, što Pavieł Paŭlikoŭski — adzin z najvybitniejšych polskich i suśvietnych režysioraŭ hetaha času, — kaža Alina Koŭšyk. — Ja lublu jahonyja raniejšyja filmy — heta i «Chałodnaja vajna», i «Ida». Tak što była radaja stać častkaju hetaha pracesu! I cikava, što šmat ludziej, jakija hrali ŭ masoŭcy, prychodzili tudy mienavita ź lubovi da kino».

Kanski kinafiestyval pačaŭsia 14 maja.

U polskich kinateatrach «Baćkaŭščyna» vyjdzie 19 červienia. Prakatu ŭ Biełarusi nie anansavali.

• 0
• 0
• 0
• 0
• 0
• 0
• 0
• 0