12‑hadovuju ispanskuju dziaŭčynku zhvałcili piać adnakłaśnikaŭ na dni naradžeńnia. Im za heta ničoha nie budzie
Adnakłaśniki, abvinavačanyja ŭ hrupavym zhvałtavańni, byli adchileny ad zaniatkaŭ tolki na tydzień, bo jany zanadta małyja, kab nieści kryminalnuju adkaznaść.
Ilustracyjny zdymak. Fota: Gatty Images
Jak piša Diario de Burgos, pra vypadak, jaki adbyŭsia ŭ siaredzinie maja, u palicyju Burhasa paviedamiła siamja dziaŭčynki. Paciarpiełaja śćviardžaje, što stała achviaraj hvałtu z boku svaich adnakłaśnikaŭ padčas śviatkavańnia dnia naradžeńnia, jakoje prachodziła ŭ hramadskim miescy niepadalok ad škoły.
Jak paviedamlajecca, na dziaŭčynku napali piać ci šeść chłopčykaŭ va ŭzroście 11—12 hadoŭ. Paśla taho, jak pra zdareńnie stała viadoma, mierkavanych udzielnikaŭ adchilili ad zaniatkaŭ na piać dzion.
Paźniej im dazvolili viarnucca ŭ škołu, adnak, pavodle źviestak vydańnia, ich časova vyvieli sa zvyčajnaha składu kłasa i arhanizavali navučańnie ŭ asobnaj hrupie razam ź niekalkimi inšymi vučniami. U škole heta patłumačyli žadańniem nie dapuścić, kab dzieci stali abjektam ckavańnia abo hramadskaha asudžeńnia z boku adnahodkaŭ paśla taho, što adbyłosia.
Paciarpiełaja dziaŭčynka taksama viarnułasia da navučańnia, choć, pavodle źviestak vydańnia, dahetul adčuvaje nastupstvy pieražytaha jak u fizičnym, tak i ŭ emacyjnym płanie. Pra vypadak viedaje pravincyjnaje ŭpraŭleńnie adukacyi, jak i ŭsia školnaja supolnaść navučalnaj ustanovy, dzie vučacca mierkavanyja ŭdzielniki napadu.
Pakolki ŭsim mierkavanym udzielnikam zdareńnia mienš za 14 hadoŭ, jany nie padlahajuć kryminalnaj adkaznaści pavodle ispanskaha zakanadaŭstva. Paśla atrymańnia zajavy palicyja ŭstanaviła ich asoby i pieradała materyjały ŭ prakuraturu pa spravach niepaŭnaletnich. U dalejšym spravu pavinny nakiravać u śpiecyjalnuju słužbu ŭrada Kastylii i Leona, jakaja zajmajecca vychavaŭčaj i sacyjalnaj pracaj ź dziećmi ŭ padobnych vypadkach. Na momant publikacyi hetaha jašče nie adbyłosia.
Heta aznačaje, što dziaciej nie buduć sudzić u kryminalnym paradku i jany nie atrymajuć sudzimaści niezaležna ad ciažkaści abvinavačańniaŭ. Zamiest suda i kryminalnaha pakarańnia ŭ padobnych vypadkach u Ispanii vykarystoŭvajucca vychavaŭčyja i sacyjalnyja miery: da pracy padklučajucca sacyjalnyja słužby i śpiecyjalisty, a hałoŭnaja meta zaklučajecca nie ŭ pakarańni, a ŭ karekcyi pavodzin i praduchileńni padobnych vypadkaŭ u budučyni.
Čytajcie taksama:
Školniki abmieńvalisia dypfejkavymi porna svaich adnakłaśnic. I ich nie zmahli pakarać
U Francyi dziciačy chirurh hvałciŭ pacyjentaŭ, kali jany byli pad narkozam