USU nanieśli paśpiachovyja ŭdary pa troch mastach na Danbasie

Hienieralny štab Uzbrojenych sił Ukrainy paviedamiŭ, što ŭ noč na 29 červienia i napiaredadni byli naniesienyja ŭdary pa troch mastach na akupavanych terytoryjach Danieckaj i Łuhanskaj abłaściej. Hetyja abjekty vykarystoŭvalisia rasijskimi vojskami dla pierakidańnia asabovaha składu, uzbrajeńnia i bojeprypasaŭ.

Most praz Hruzski Jałančyk kala Novaazoŭska

Paviedamlajecca, što byŭ paškodžany aŭtamabilny most kala Novaazoŭska ŭ Danieckaj vobłaści, a taksama dva čyhunačnyja masty ŭ Łuhanskaj vobłaści.

Kiraŭnik akupacyjnaj administracyi Novaazoŭskaj akruhi Vasil Aŭčaroŭ paćvierdziŭ častkovaje abrušeńnie mosta praz raku Hruzski Jałančyk. Pa jaho słovach, adna pałasa ruchu razburanaja, a druhaja nieprydatnaja dla prajezdu. Abjezd arhanizavany praź viosku Husielščykava. Heta ŭžo druhaja ataka na hety most za červień.

Akramia taho, Hienštab Ukrainy paviedamiŭ pra ŭdary pa składzie materyjalna-techničnych srodkaŭ u rajonie Novaśviatłoŭki Łuhanskaj vobłaści, troch punktach kiravańnia bieśpiłotnikami i abjekcie radyjoelektronnaj baraćby. Taksama, jak śćviardžajecca, byli atakavanyja dva abjekty ŭ Maskoŭskaj vobłaści, jakija zabiaśpiečvali vajskovuju suviaź.

Ukrainskaje kamandavańnie zajaŭlaje, što praciahvaje nanosić udary pa transpartnaj i vajskovaj infrastruktury na akupavanych terytoryjach, imknučysia ŭskładnić łahistyku rasijskich vojskaŭ. Raniej u červieni taksama paviedamlałasia pra ataki na masty, jakija złučajuć Chiersonskuju vobłaść z Krymam, a taksama na čyhunačny most cieraz Paŭnočna-Krymski kanał.

Ukrainskija ŭłady nieadnarazova zajaŭlali pra namier uzmacnić cisk na rasijskija vajskovyja kamunikacyi, u tym liku ŭ Krymie, kab prymusić Rasiju pajści na zaviaršeńnie vajny.

Kamientary da artykuła