U Minsku aryštavali «čornaha ryełtara», jaki sprabavaŭ zavałodać kvateraj ałkaholika

U Minsku zatrymali 37‑hadovaha raniej sudzimaha «pradstaŭnika adnoj z dyjaspar», jakoha padazrajuć u sprobie niezakonna zavałodać dvuchpakajovaj kvateraj 49‑hadovaha minčuka, paviedamlaje pres-słužba MUS.

Skrynšot ź videa

Pa infarmacyi siłavikoŭ, na praciahu dvuch miesiacaŭ padazravany metanakiravana zdabyvaŭ davier uładalnika žylla. Mužčyna mieŭ prablemy z ałkaholem, čym, jak śćviardžajecca, i skarystaŭsia złamyśnik.

Spačatku jon pradstaviŭsia ryełtaram i zajaviŭ, što nibyta atrymaŭ infarmacyju pra kvateru z zapazyčanaściu pa kamunalnych płaciažach ad siłavikoŭ. Kab zavajavać davier haspadara, jon dapamahaŭ jamu apłačvać žyllova-kamunalnyja pasłuhi i pieradavaŭ nievialikija sumy hrošaj, stvarajučy ŭražańnie kłopatu.

Napiaredadni afarmleńnia ździełki ŭładalnik kvatery daviedaŭsia, što zamiest abiacanaj adnapakajovaj kvatery ŭ Minsku i hrašovaj dapłaty jamu prapanujuć pierajechać u nasieleny punkt prykładna za 50 kiłamietraŭ ad stalicy. Paśla hetaha mužčyna admoviŭsia pradavać žyllo.

Tady padazravany, pavodle śledstva, pierajšoŭ ad uhavoraŭ da pahroz i fizičnaha hvałtu. Jon źbiŭ paciarpiełaha i prymusiŭ jaho napisać raśpisku pra nibyta najaŭny bujny doŭh.

Paśla zatrymańnia śledčyja raspačali kryminalnuju spravu pa artykule ab vymahalnictvie z metaj atrymańnia majomasnaj vyhady ŭ asabliva bujnym pamiery. Pavodle zakanadaŭstva, sankcyja hetaha artykuła praduhledžvaje pakarańnie da 15 hadoŭ pazbaŭleńnia voli.

Kamientary da artykuła