Troje biełaruskich maładzionaŭ pajechali ŭ Maskvu pa chutkija hrošy. Ciapier ich buduć sudzić
Troje biełarusaŭ — 21‑hadovaja dziaŭčyna, jaje 20‑hadovy chłopiec i 17‑hadovy małodšy brat — pajechali ŭ Maskvu ŭ nadziei chutka zarabić šmat hrošaj, ale ŭ vyniku stali fihurantami kryminalnaj spravy, piša «Moskovskij komsomolec».
Fota: Śledčy kamitet Rasii
Maładyja biełarusy dapamahali rasijskim telefonnym machlaram i adkazvali za techničny bok ich dziejnaści. Jany chavali pa zdymnych kvaterach tak zvanyja SIM-boksy — śpiecyjalnyja pryłady, jakija dazvalajuć padmianiać numary telefonaŭ i arhanizoŭvać masavyja zvanki patencyjnym achviaram z roznych krain.
Kab nie trapić u ruki siłavikam, udzielniki schiemy pastajanna mianiali miesca žycharstva i padtrymlivali suviaź praz abaronienyja čaty. Za svaju pracu jany atrymlivali hrošy ŭ kryptavalucie.
Pry hetym maštab dziejnaści ŭražvaje. Tolki za adzin tydzień praź dzieviać SIM-boksaŭ prajšło amal 69 tysiač zvankoŭ. Jak minimum troje žycharoŭ Rasii paśla razmoŭ z machlarami stracili ŭsie svaje aščadžeńni.
Ale dziejnaść praciahvałasia niadoŭha, nieŭzabavie biełarusaŭ zatrymali. Udzielniki schiemy całkam pryznali vinu. Śledstva pa spravie ŭžo zavieršana, ciapier materyjały pieradajuć u sud.
Za dapamohu telefonnym machlaram biełarusam pahražaje da šaści hadoŭ pazbaŭleńnia voli, a taksama značny štraf.
Čytajcie taksama:
Machlary stali rassyłać biełaruskamoŭnyja paviedamleńni ad DAI nibyta dla apłaty štrafaŭ