Machlary stali rassyłać biełaruskamoŭnyja paviedamleńni ad DAI nibyta dla apłaty štrafaŭ
U milicyju źviarnuŭsia 19‑hadovy minčuk, jaki staŭ achviaraj kibiermachlaroŭ. Jamu pryjšło SMS-paviedamleńnie nibyta ad Ministerstva ŭnutranych spraŭ z patrabavańniem apłacić štraf pa linii DAI.
U biełaruskamoŭnym paviedamleńni była spasyłka na sajt, jaki vydavaŭ siabie za płaciežny servis ARIP. Adnak zamiest biełaruskaha damiena «by» u spasyłcy vykarystoŭvaŭsia inšy damien. Nie zaŭvažyŭšy padmieny, małady čałaviek pierajšoŭ na fišynhavuju staronku.
Padrobleny sajt vizualna amal całkam kapijavaŭ interfiejs asabistaha kabinieta ARIP. Pavieryŭšy jamu, paciarpieły ŭvioŭ rekvizity svajoj bankaŭskaj karty.
U vyniku ź jaho rachunku machlary śpisali 50 bachrejnskich dynaraŭ, što składaje kala 400 biełaruskich rubloŭ.
Śledčyja zaviali pa fakcie machlarstva kryminalnuju spravu.
Milicyja nahadvaje hramadzianam nie pierachodzić pa spasyłkach z SMS-paviedamleńniaŭ, asabliva kali jany tyčacca štrafaŭ, płaciažoŭ abo bankaŭskich apieracyj. Kab skarystacca servisam ARIP, rekamiendujecca samastojna adkryvać jaho praz braŭzier abo aficyjny mabilny bankaŭski dadatak.
Taksama varta ŭvažliva praviarać napisańnie damiennych imionaŭ pierad tym, jak uvodzić asabistyja źviestki abo rekvizity bankaŭskaj karty.
Kamientary