Chłopca, jaki žyŭ u Ivana-Frankoŭsku i pryjechaŭ u hości da svajakoŭ u Rasiju, pasadzili na 13 hadoŭ — za danaty na $60
Śviardłoŭski abłasny sud u Rasii prysudziŭ 34‑hadovaha Ivana Stałbova da 13 hadoŭ kałonii strohaha režymu pa abvinavačańni ŭ dziaržaŭnaj zdradzie. Padstavaj dla kryminalnaj spravy stali 11 finansavych tranzakcyj na rachunak adnoj z ukrainskich arhanizacyj. Pavodle źviestak suda, kožny pieravod składaŭ prykładna 100 hryŭniaŭ (kala 2,24 dalara), piša vydańnie «Miediazona».
Fota: «Miediazona»
Ivan Stałboŭ naradziŭsia ŭ horadzie Sarapule, što va Udmurcii, i maje rasijskaje hramadzianstva. Da zatrymańnia jon žyŭ va ŭkrainskim Ivana-Frankoŭsku i nie mieŭ rehistracyi ŭ Rasii.
U Rasiju mužčyna, jaki pracavaŭ mieniedžaram pa zakupkach, pryjechaŭ, kab praviedać svajakoŭ. Jaho zatrymali ŭ aeraporcie Jekaciarynburha «Kalcova».
Pavodle sudovych materyjałaŭ, Stałbova zatrymali ŭ pačatku lipienia 2025 hoda. Paśla hetaha jaho trojčy aryštoŭvali pa administracyjnych pratakołach. Spačatku — za drobnaje chulihanstva, a paźniej jašče dvojčy — za drobnaje chulihanstva i niepadparadkavańnie supracoŭniku FSB.
Apošnija dva zatrymańni adbylisia adrazu paśla vychadu mužčyny ź jekaciarynburhskaha śpiecpryjomnika. U sudovych rašeńniach śćviardžałasia, što ranicaj jon nibyta łajaŭsia kala budynka nasuprać śpiecpryjomnika.
Adnak maci i siastra Stałbova, jakija pryjechali sustrakać jaho kala 8‑j ranicy, tak i nie dačakalisia svajaka. Pavodle ich słoŭ, kala 8:36 da varot śpiecpryjomnika padjechali nieviadomyja ludzi ŭ maskach, a prykładna praz čatyry chviliny aŭtamabil vyjechaŭ z terytoryi.
Advakatka Stałbova zajaviła ŭ sudzie, što jaje padabaronnaha pasadzili ŭ mašynu i vyvieźli niepasredna z terytoryi śpiecpryjomnika. Ad dadatkovych kamientaroŭ jana admoviłasia, spasłaŭšysia na advakackuju tajamnicu.
Taksama ŭ sudovym rašeńni adznačajecca, što Stałboŭ chvareje na junackuju epilepsiju i z 17 hadoŭ prymaje leki.
Čytajcie taksama:
Abnoŭlena baza vyšuku Rasii: ciapier u joj amal 6 000 biełarusaŭ