Abnoŭlena baza vyšuku Rasii: ciapier u joj amal 6 000 biełarusaŭ
Rasijskaja milicyja praciahvaje abjaŭlać biełarusaŭ u vyšuk. Za apošnija paŭhoda ŭ śpis trapili 1 118 hramadzian i ŭradžencaŭ Biełarusi — ciapier u im amal 6 tysiač čałaviek. U rasijski vyšuk biełarusy traplajuć pa zapycie RB — heta značyć, što čałavieka šukajuć u abiedźviuch krainach, a taksama mohuć vydać z «siabroŭskich krain», piša «Miedyjazona».
Z kastryčnika 2025 hoda ŭ vyšuk byli abvieščanyja niekalki žurnalistaŭ i žurnalistak: rasśledavalnica Taćciana Ašurkievič, viadučy prajekta «Zroblena ŭ Polščy» Maksim Paršuta, žurnalistka i redaktarka Deutsche Welle Uljana Babajed, miedyjakansultant Dzianis Vasilkoŭ, žurnalistka z Homiela Alena Hiermanovič, aŭtar prajekta «Čestnok Live» i były palitźniavoleny Alaksandr Ivulin, muzyčny žurnalist i piśmieńnik Alaksandr Čarnucha.
Akramia taho, Biełaruś praciahvaje abjaŭlać u vyšuk byłych palitźniavolenych. Na hety raz siarod ich — zatrymanaja ŭ 2020 hodzie 44‑hadovaja aktyvistka Viktoryja Kulša. Sud pryznačyŭ joj 2,5 hoda kałonii, ale ŭ źniavoleńni suprać jaje niekalki razoŭ raspačynali novyja kryminalnyja spravy pa artykule ab złosnym niepadparadkavańni administracyi kałonii, i jaje termin skłaŭ 6,5 hadoŭ. Viktoryju vyzvalili ŭ śniežni 2025 hoda ŭ składzie hrupy palitviaźniaŭ, vyviezienych va Ukrainu paśla čarhovaha raŭnda pieramoŭ pamiž pradstaŭnikami prezidenta ZŠA Donalda Trampa i Alaksandram Łukašenkam. Kulša praviała ŭ źniavoleńni bolš za 5 hadoŭ.
U vyšuku znachodziacca asudžanyja pa «spravie Hajuna» 25‑hadovy Mikita Łosik, 46‑hadovy Dźmitryj Bajcoŭ, 31‑hadovy Anton Arciuch, 27‑hadovy Siarhiej Cyhankoŭ; asudžanyja pa abvinavačańni ŭ hrubym parušeńni paradku 26‑hadovaja vałanciorka Kira Bajarenka, 41‑hadovy Andrej Bubien, 45‑hadovy Siarhiej Huń, 29‑hadovaja vieterynarka Jana Žuraŭlova, 34‑hadovy Dźmitryj Kanaplanik, 23‑hadovy były student BNTU Hleb Muravicki.
Šukajuć 24‑hadovaha byłoha studenta chimfaku BDU Arcioma Bajarskaha, asudžanaha na 5 hadoŭ kałonii pa abvinavačańni va ŭdziele ŭ pratestach i stvareńni «ekstremisckaha farmiravańnia», jaki całkam adbyŭ termin. Šukajuć i šmatdzietnuju maci Natallu Hovaravu, asudžanuju za abvinavačańni ŭ abrazie Alaksandra Łukašenki i pradstaŭnika ŭłady.
U vyšuk trapiła vykładčyca Volha Fiłatčankava, asudžanaja pa «spravie studentaŭ», a taksama dvoje abvinavačanych pa spravie «Sajuza Biełaruskaha nacyjanalnaha ščyta» — 20‑hadovy Aleh Dabrydnioŭ i 22‑hadovy Uładzisłaŭ Jefimovič.
25‑hadovy Jakaŭ Šafarenka, zatrymany pa abvinavačańni va ŭdziele ŭ masavych biesparadkach u Breście ŭ 2020 hodzie i asudžany na 5,5 hadoŭ kałonii, a taksama asudžany na 4,5 hoda Pavieł Nikicienka; jany byli vyzvaleny i vyviezieny ŭ Litvu ŭ vieraśni 2025 hoda ŭ składzie hrupy palitviaźniaŭ pa vynikach pieramoŭ pamiž pradstaŭnikami ZŠA i Alaksandram Łukašenkam.
24‑hadovy Arciom Sakovič, asudžany na 4 hady kałonii pa spravie ab «masavych biesparadkach» u 2020 hodzie.
Biełaruś i Rasija šukajuć stvaralnicu inicyjatyvy Partyzanka, jurystku Hannu Macijeŭskuju, aktyvistku Nastu Bazar, pazbaŭlenuju licenzii advakatku Maryju Kolesavu-Hudzilinu, ekanamistku Alisu Ryžyčenku, palitołahiniu Alinu Charysavu, a taksama daradcu Śviatłany Cichanoŭskaj pa moładzi Marharytu Vorychavu, supracoŭnikaŭ «Centra novych idej» — Antona Radniankova i Darju Rubleŭskuju.
Taksama ŭ vyšuku znachodziacca psichałahinia Natalla Skibskaja, dobraachvotnik z «Pałka Kalinoŭskaha» Mikita Zabuha, pradprymalnik Andrej Varonin, zavočna asudžany na 3 hady kałonii, režysiorka Hanna Badziaka, ekanamist Dźmitryj Kruk, błohierka Karalina Kananovič, režysior Andrej Kurejčyk, aktyvistka Stanisłava Ciarenćjeva, palityk Anatol Labiedźka, aktyvistka «Moładziovaha błoka» Lizavieta Prakopčyk.
Jak pravieryć siabie
Časta ŭ śpisie nie ŭkazvajecca, pa jakim artykule šukajuć čałavieka. Zamiest hetaha — nadpis «u vyšuku pa artykule KK» i kantaktny numar adździaleńnia milicyi. Časam u apisańni paznačany asablivyja prykmiety i fotazdymki šukanych.
Znakam «+» adznačanyja tyja, kaho dadali ŭ bazu ŭ pieryjad z kastryčnika da krasavika 2026 hoda. Tyja, kaho za hety čas ź jaje vydalili — adznačanyja kryžykam «ch»
Kamientary