U hamielčuka žyŭ krakadził, a ciapier jon maje raślinu, jakoj bolš niama ŭ dzikaj pryrodzie

«Kolki siabie pamiataju, z rańniaha dziacinstva, ja abažaju ŭsio žyvoje — pryrodu, raśliny, žyvioł, nasiakomych. I, adpaviedna, usio žyćcio heta majo zachapleńnie», — tłumačyć Siarhiej.

Pry hetym cikava, što adukacyju mužčyna atrymaŭ zusim nie źviazanuju z žyviołami ci raślinami. Siarhiej skončyŭ ekanamičny fakultet, a śpiecyjalnaść — biznes i piersanał. Jon pryznajecca, što cikaviŭsia i IT, ale ŭ vyniku vyrašyŭ, što siadzieć za kampjutaram — heta nie jahonaje.

Pavialičyć

Ad skarpijonaŭ da krakadziła

Ahułam Siarhiej maje 15 hadoŭ dośviedu pracy z ekzatyčnymi žyviołami. Niekalki hadoŭ tamu ŭ jaho była ahromnistaja kalekcyja samych roznych reptylij i nasiakomych. Ale paśla zdaryŭsia kavid, praź jaki mužčyna ledź nie pamior. Potym adbyŭsia pierajezd i bolšuju častku kalekcyi žyvioł pryjšłosia raspradać. Ale jaje maštaby na piku sapraŭdy ŭražvajuć:

• 20 vidaŭ trapičnych tarakanaŭ;
• 5 vidaŭ hryzunoŭ (naprykład, palatucha zvyčajnaja, cukrovy posum);
• 3 vidy źmiej (tyhravy piton-albinos, maisavy połaz i ŭdaŭ);
• niekalki vidaŭ pałačnikaŭ;
• niekalki vidaŭ konikaŭ;
• drapiežnyja trapičnyja kłapy;
• 8 vidaŭ skarpijonaŭ;
• vožyk;
• bahamoły;
• 3 vidy hihanckich afrykanskich smaŭžoŭ — achacinaŭ;
• chamieleony;
• žabki;
• 4 vidy jaščarak;
• a niejki čas žyŭ navat krakadził.

«Z majoj dapamohaj ludzi mahli kuplać roznuju žyŭnaść, i kali praz maje ruki prachodziŭ krakadził, jon niejki čas u mianie žyŭ», — dzielicca surazmoŭca.

Pavialičyć

Asobna Siarhiej raskazaŭ, što trymaŭ asabliva niebiaśpiečnych atrutnych drapiežnych kłapoŭ. Hetyja nasiakomyja dasiahali pamieraŭ u dva karabki zapałak i mieli krylcy. Kab ich hadavać, Siarhieju pryjšłosia kupić śpiecyjalny doŭhi pincet, bo hetyja kłapy mahli atakavać kisłatoj na adlehłaść u 15 santymietraŭ. Kali jana trapić u voka, to možna zastacca biez zroku. Jašče jany mahli kusacca, i pa niekatoraj infarmacyi miesca ŭkusu moža da hoda nie zažyvać, baleć i kryvavić. Zdajecca, heta navat strašniej za krakadziła.

Nakolki składana dahladać vialikuju kalekcyju ekzotaŭ?

Siarhiej pryznajecca, što z samaha pačatku imknuŭsia zrabić svaju sistemu pa dohladzie za žyviołami maksimalna samadastatkovaj. Jon nie chacieŭ zaležyć ad pastaŭščykoŭ, tamu navat karmavych nasiakomych vyroščvaŭ sam — tak było i tańniej, i nadziejniej.

Pavialičyć

U niejki momant usio nastolki naładziłasia, što ekzoty pačali «karmić» nie tolki siabie, ale i svajho haspadara: hrošy ad prodažu išli na novyja insiektaryumy i lepšyja ŭmovy.

«Ja lublu, kali ŭsio pracuje bieź źniešniaj dapamohi, — raskazvaje mužčyna. — Heta takoje zamknionaje koła: jany kormiać adzin adnaho, a ŭrešcie i mianie taksama».

Pry hetym, pa jaho słovach, času heta patrabuje mienš, čym zdajecca. Kali kalekcyja tolki farmavałasia, na dohlad išło da 5 hadzin u dzień, ale ciapier nie bolš za 2. A voś kali pačynajucca hienieralnyja prybirańni, to byvaje i ŭsie 6 hadzin iduć.

Pavialičyć

«Kali ŭsio adładžana, heta nie tak ciažka, — tłumačyć hamialčuk. — Vada, ježa, čyścinia — i dalej jany žyvuć svaim žyćciom».

Moža padacca dziŭnym, ale najbolš resursu patrabujuć nie nasiakomyja, a reptylii. Naprykład, zvyčajnaja čyrvanavuchaja čarapacha, jakuju lohka nabyć i jakaja kaštuje niadoraha, u dohladzie akazałasia składaniejšaj za pavukoŭ: joj patrebnyja darahija vitaminy, kalcyj, śpiecyjalnyja lampy i ceły abstalavany teraryum.

Toje ž samaje i z raślinami — kab jany raśli i raśćvitali, davodzicca bieśpierapynna ekśpierymientavać z hruntam, aśviatleńniem i vilhotnaściu, bo hatovyja sumiesi z kram časta akazvajucca prosta rekłamaj.

«Raniej dumałasia: u babuli ž usio rasło na padvakońniku. A ciapier razumieju, što i z raślinami, i z žyviołaj usio — sucelnyja ekśpierymienty», — dzielicca Siarhiej.

Pavialičyć

Euphorbia geroldii: kvietka ź minułaha

Siońnia ŭ Siarhieja zastalisia tolki čatyry-piać pavukoŭ-ptuškajedaŭ, trapičnyja mnahanožki-kiŭsiaki i niekalki vidaŭ tarakanaŭ vyklučna jak karmavyja.

Akramia ekzatyčnych žyvioł mužčyna taksama pačaŭ vyroščvać i raśliny.

Pavialičyć

«Praz toje, što peŭnyja ekzatyčnyja nasiakomyja patrabujuć va ŭmovach našych kvater korm u vyhladzie peŭnych raślin, ja pačaŭ vyroščvać pakajovyja raśliny. Z časam heta pierarasło ŭ vialikuju kalekcyju chatnich kvietak. A jak ja pierajechaŭ z kvatery ŭ dom, pastupova źjaviłasia jašče i kalekcyja vuličnych raślin. Tamu ciapier u mianie i chatnija raśliny, i vuličnyja, i ekzatyčnyja žyvioły», — raskazvaje hamialčuk.

Pavialičyć

Vidaŭ raślin, jak śćviardžaje Siarhiej, u jaho było ažno 380. Ale adna kvietka — asablivaja. Jana nazyvajecca Euphorbia geroldii — endemik paŭnočnaha ŭschodu Madahaskara. Pa danych 2015 hoda, płošča raspaŭsiudžańnia hetaj raśliny była mienšaja za 1 kvadratny kiłamietr.

Pa słovach Siarhieja, na siońnia hety vid užo całkam źnik u dzikaj pryrodzie i zachoŭvajecca vyklučna ŭ kalekcyjach takich amataraŭ, jak surazmoŭca.

Pavialičyć

«Jaje było vielmi składana atrymać. Ja sprabavaŭ dastać jaje z roznych krain — ź Ispanii, ź Vialikabrytanii, z Danii. Ale tolki z čaćviortaj sproby ź Vialikabrytanii jana dajšła da mianie.

U Homieli pravodziacca roznyja vystavy i abmieny raślinami. Šmat chto chacieŭ sa mnoj pabačycca, kab pahladzieć užyvuju na hetuju raślinu. Jana choć i nijak nie admietnaja zvonku, ale ŭbačyć toje, što vymierła ŭ žyvoj pryrodzie — heta niejkija nievymoŭnyja pačućci. Toje ž samaje, što i hladzieć na pareštki dynazaŭraŭ», — dzielicca mužčyna.

Pavialičyć

Šukaje nie tolki kvietki

Siarhiej pryznajecca, što nie spyniajecca na dasiahnutym i maryć pra sapraŭdnuju aranžareju — vialikuju, utulnuju, dzie možna budzie sabrać jašče bolš redkich raślin i žyvioł i stvaryć dla ich idealnyja ŭmovy. I pry hetym uśmichajecca: pakul što robić usio adzin, ale nie chavaje, što chacieŭ by sustreć čałavieka, ź jakim možna było b stvaryć siamju, dzialić i pobyt, i hetuju spravu.

«Kali lubiš, jany adkazvajuć tabie tym ža — kvitniejuć, rastuć, dorać nievierahodnyja vodary, — kaža Siarhiej. — Usio źviazana: i dabryniu, i čałaviečnaść usie žyvyja adčuvajuć. Asabliva luboŭ. Lubić — heta važna. Najvažniejšaje ŭ žyćci».

• 13
• 0
• 0
• 1
• 2
• 1
• 1
• 1