Na Dzień niezaležnaści Ukrainy ŭ Kijevie praviali parad vajskovych robataŭ — na ziamli, ŭ vadzie i ŭ pavietry VIDEA

Na Chraščaciku ŭ Kijevie da Dnia niezaležnaści Ukrainy praviali niezvyčajny «parad novaha pakaleńnia» — zamiest vajskoŭcaŭ centralnaj vulicaj horada prajechała kałona naziemnych rabatyzavanych kompleksaŭ, jakija vykarystoŭvajucca ŭkrainskimi vajskoŭcami na froncie, piša Hromadske.

Skrynšot ź videa

Padčas uračystaściaŭ prezident Ukrainy Uładzimir Zialenski zajaviŭ, što paśla zakančeńnia vajny Ukraina moža stać sapraŭdnym donaram biaśpieki dla svaich partnioraŭ, Jeŭropy i inšych dziaržaŭ, jakija padtrymlivali krainu. Pavodle jaho słoŭ, na paradzie pakazali technałohii, z dapamohaj jakich Ukraina abaraniaje žyćcio svaich ludziej.

Pa Chraščaciku prajechali naziemnyja robaty «Ryś PRO» i «Termit», pryznačanyja dla łahistyčnych, evakuacyjnych i bajavych zadač. Takija kompleksy mohuć pieravozić bojeprypasy, vadu i ježu, a taksama dapamahać evakujavać paranienych. Adnačasova apieratary demanstravali ŭkrainskija bieśpiłotniki, u tym liku dron-pierachopnik P1-Sun.

Akramia naziemnaj techniki, byli pakazanyja i nadvodnyja bieśpiłotnyja sistemy «Mahura», Sea Baby i «Sarhan». Takim čynam, arhanizatary chacieli padkreślić raźvićcio ŭkrainskich vajskovych technałohij na sušy, u vadzie i ŭ pavietry.

U Ministerstvie abarony Ukrainy paviedamili, što z pačatku 2026 hoda naziemnyja rabatyzavanyja kompleksy ŭžo vykanali bolš za 100 tysiač misij. Jany zajmalisia dastaŭkaj nieabchodnych hruzaŭ i evakuacyjaj paranienych. U lipieni kolkaść takich zadač dasiahnuła amal 20 tysiač suprać 7,5 tysiačy ŭ studzieni.

Minabarony ŭžo zakantraktavała bolš za 22 tysiačy naziemnych robataŭ. Akramia taho, z pačatku hoda ŭkrainskija vajskoŭcy praz Brave1 Market zakazali takuju techniku amal na 1,9 miljarda hryŭniaŭ (kala 42,5 miljona dalaraŭ).

U ministerstvie padkreślili, što vykarystańnie robatatechniki dazvalaje źnižać ryzyku dla vajskoŭcaŭ, pakolki častku niebiaśpiečnych zadač mohuć vykonvać mašyny zamiest ludziej.

Kamientary da artykuła