Jašče dva spadarožniki z rasijskaha anałaha Starlink nie zmahli padniacca na svaju arbitu

U rasijskaj spadarožnikavaj sistemy «Rasśviet», jakuju stvarajuć jak ułasny anałah Starlink, uźnikli novyja prablemy, piša The Moscow Times.

Fota: «Biuro 1440»

Jak adznačajuć ekśpierty, jak minimum dva spadarožniki, zapuščanyja 20 lipienia ŭ składzie druhoj hrupy, nie zmahli padniacca na svaju arbitu. Jany apuścilisia nižej za 300 km i, vierahodna, nieŭzabavie ŭvojduć u ščylnyja słai atmaśfiery i zharać.

Jašče try aparaty taksama niaŭdała sprabavali pavysić arbitu i ciapier znachodziacca na vyšyni kala 310—330 km. Dzieviać spadarožnikaŭ praciahvajuć manieŭry, ale ich arbity prykładna na 200 km nižejšyja, čym u pieršaj hrupy rasijskich aparataŭ na anałahičnym etapie palotu.

Pieršuju hrupu z 17 spadarožnikaŭ kampanija «Biuro 1440», jakaja kuryruje prajekt, zapuściła ŭ kancy sakavika. Adzin ź ich nie zmoh vyjści na patrebnuju arbitu i ŭpaŭ u pačatku červienia. Bolšaść astatnich udałosia vyvieści na vyšyniu krychu bolšuju za 500 km, choć pieršapačatkova metaj nazyvałasia arbita na 800 km.

Usia sistema «Rasśviet-3» pavinna zabiaśpiečvać šyrokapałosnuju spadarožnikavuju suviaź pa ŭsim śviecie. Adnak prablemy z pavyšeńniem arbity mohuć skaracić termin słužby aparataŭ, bo na vyšyni kala 500 km im patrabujecca bolš paliva dla ŭtrymańnia pazicyi.

Rasija płanuje razharnuć spačatku 350 spadarožnikaŭ, a nadalej pavialičyć hrupoŭku da 900. Kamiercyjny zapusk sistemy zapłanavany na 2027 hod. Ułady taksama razhladajuć jaje vykarystańnie dla kiravańnia bajavymi bieśpiłotnikami.

Kamientary da artykuła