Ukraina paprasiła Iłana Maska dazvolić vykarystańnie Starlink dla naniasieńnia ŭdaraŭ pa terytoryi Rasii na hłybiniu da 200 kiłamietraŭ

Kijeŭ damahajecca dazvołu Iłana Maska na vykarystańnie bieśpiłotnikaŭ sa Starlink dla atak na infrastrukturu dla zapusku balistyčnych rakiet na terytoryi Rasii na adlehłaści da 200 km, piša Financial Times sa spasyłkaj na krynicy. U vypadku ŭchvaleńnia ŭ zonu paražeńnia mohuć trapić šeść abłasnych centraŭ u mižnarodna pryznanych miežach.

Uładzimir Zialenski prasiŭ Donalda Trampa pahavaryć z Maskam ab atrymańni takoha dazvołu padčas sustrečy ŭ Biełym domie ŭ lipieni, raspaviali haziecie surazmoŭcy, jakija prysutničali na sustrečy. U Kijevie ličyli, što abmiežavańnie hłybini zapusku dronaŭ mahło b padšturchnuć Maska da zhody, piša FT.

Adnak Tramp adrazu nie daŭ adnaznačnaha adkazu, skazali krynicy, jakija prysutničali na sustrečy. Surazmoŭcy haziety ličać, što amierykanski prezident nie padtrymaŭ hety płan, a Mask nie daść svajho adabreńnia Kijevu.

Pieraškodaj taksama moža stać toje, što były ministr abarony Ukrainy Michaił Fiodaraŭ, jaki mieŭ pramuju suviaź z Maskam, byŭ zvolnieny, piša FT. Mienavita paśla prośby Fiodarava Mask zabłakavaŭ vykarystańnie Starlink rasijskimi vajskoŭcami, što, pavodle słoŭ ukrainskich vajskoŭcaŭ i čynoŭnikaŭ, chutka paŭpłyvała na rasijskija ataki.

U zonu 200 km ad mižnarodna pryznanaj miažy Rasii i Ukrainy traplajuć bujnyja rasijskija harady, u tym liku Bransk, Kursk, Biełharad, Varoniež, Rastoŭ-na-Donie i Krasnadar, zaznačaje «Ahienctva».

Atrymańniem dazvołu na vykarystańnie dronaŭ sa Starlink Kijeŭ sprabuje vyrašyć prablemu, jakaja ŭźnikła praź niedachop pierachopnikaŭ Patriot — adzinaj sistemy, jakaja dazvalaje ŭkrainskim vajskoŭcam paśpiachova źbivać balistyčnyja rakiety, piša FT. Vajenny analityk Franc-Štefan Hadzi skazaŭ haziecie, što Ukraina moža pierajści da bolš aktyŭnaj stratehii abarony, nakiravanaj na źniščeńnie puskavych ustanovak, sistem kiravańnia, materyjalna-techničnaha zabieśpiačeńnia i inšych srodkaŭ, jakija zabiaśpiečvajuć rakietnyja ataki.

Bieśpiłotniki sa Starlink vykarystoŭvajuć spadarožniki dla padtrymańnia bolš nadziejnaj suviazi z apieratarami na bolšaj adlehłaści, čym zvyčajnyja BPŁA, piša hazieta. Taksama jany mienš uraźlivyja da pieraškod. Jany «mohuć być vielmi karysnymi ŭ palavańni» na puskavyja ŭstanoŭki, kaža Hadzi.

Upieršyniu pra toje, što Ukraina choča vykarystoŭvać Starlink dla ŭdaraŭ pa rasijskaj terytoryi, paviedamiła The Atlantic u kancy lipienia. U pačatku žniŭnia Fiodaraŭ, jaki ŭžo nie byŭ ministram abarony, raspavioŭ u padkaście z błohieram Siarhiejem Sternienkam, što praciahvaje pieramovy z Maskam ab vykarystańni Starlink u rasijskim tyle, ale dasiahnieńnie nieabchodnaha Kijevu vyniku nazvaŭ składanaj zadačaj.

Deficyt rakiet Patriot pakinuŭ Ukrainu praktyčna biez abarony ad rasijskich balistyčnych rakiet. Na hetym fonie Ukraina navat pierastała publikavać danyja pra kolkaść rakiet, zapuščanych Rasijaj.

• 3
• 1
• 0
• 1
• 0
• 0
• 0
• 0