U Biełarusi zapuściać rasijskuju sistemu, jakaja prezientujecca jak anałah Starlink
U Biełarusi płanujecca zapusk rasijskaha anałaha sistemy Starlink u miežach supracoŭnictva pamiž rasijskaj aerakaśmičnaj kampanijaj «Biuro 1440» i biełaruskim nacyjanalnym spadarožnikavym apierataram «Bielintersat», piša vydańnie Office Life.
Baki padpisali pahadnieńnie ab supracy, jakoje razhladajecca jak pieršy krok da pašyreńnia mižnarodnych prajektaŭ u śfiery telekamunikacyj. Z rasijskaha boku adznačajecca, što heta pačatak vychadu na zamiežnyja rynki i raźvićcia supracoŭnictva z telekam-apieratarami inšych krain.
U biełaruskim «Bielintersacie» padkreślivajuć, što prajekt pavinien dapamahčy skaracić ličbavaje nieraŭnapraŭje pamiž rehijonami i dać impuls raźvićciu suviazi ŭ addalenych rajonach. Taksama heta razhladajecca jak krok u bok impartazamiaščeńnia i pavyšeńnia technałahičnaj niezaležnaści ŭ krytyčnaj infrastruktury.
Sistema, jakuju raspracoŭvaje «Biuro 1440», ujaŭlaje saboj nizkaarbitalnuju spadarožnikavuju sietku. Jana zadumanaja jak anałah amierykanskaha Starlink i pavinna zabiaśpiečvać chutkasny šyrokapałosny internet z hłabalnym pakryćciom. Płanujecca vykarystańnie hrupoŭki z sotniaŭ spadarožnikaŭ, jakija mohuć zabiaśpiečvać vysokuju chutkaść pieradačy danych — da ŭzroŭniu kala 1 Hbit/s.
Praŭda, pakul heta ŭsio tolki ŭ płanach, bo navat sama Rasija nie zmahła paŭnavartasna zamianić Starlink svaim anałaham paśla taho, jak joj pierakryli mahčymaść vykarystoŭvać hetu sistemu pa-piracku na ŭkrainskim froncie.
Sam Starlink, jaki naležyć kampanii Iłana Maska SpaceX, nie pracuje ŭ Biełarusi, tamu alternatyŭnyja rašeńni razhladajucca jak važny technałahičny kirunak. Jašče ŭ 2024 hodzie abmiarkoŭvalisia płany pa stvareńni padobnaj sistemy dla patreb Uzbrojenych sił Biełarusi.
Stała viadomaja asoba rabočaha «Biełaruśkalija», jaki zahinuŭ pry abrušeńni hornaj parody1
Kamientary