Tramp nie vieryć u mahčymaść napadu Rasii na krainy NATA

Prezident ZŠA Donald Tramp zajaviŭ, što nie baicca mahčymaha napadu Rasii na krainy NATA i ličyć, što Maskva nie budzie atakavać terytoryju Aljansu, paviedamlaje Axios sa spasyłkaj na telefonnaje intervju ź im.

Donald Tramp. Fota: Andrew Harnik/Getty Images 

Raniej źjavilisia paviedamleńni, što dyrektar CRU Džon Retklif padčas tajemnaha vizitu ŭ Maskvu 25 žniŭnia moh pieradać rasijskim uładam papiaredžańnie nie napadać na krainy NATA. Adnak Tramp heta admaŭlaje.

Pavodle jaho słoŭ, sustreča Retklifa z kiraŭnikom rasijskaj raźviedki Siarhiejem Naryškinym była zvyčajnaj i takija kantakty adbyvajucca prykładna raz na paŭhoda abo hod. Tramp padkreśliŭ, što nijakaha śpiecyjalnaha pasłańnia Maskvie nie pieradavałasia.

Na pytańnie pra mahčymuju rasijskuju pravakacyju suprać NATA amierykanski prezident adkazaŭ: «Ja zusim hetym nie pierajmajusia. Nijakich prablem niama». Paźniej jon dadaŭ: «Jany nie źbirajucca atakavać terytoryju NATA».

Raniej niekatoryja amierykanskija i jeŭrapiejskija ŚMI paviedamlali, što Retklif moh papiaredzić Rasiju pra niedapuščalnaść eskałacyi suprać krain Aljansu, u tym liku Estonii, Łatvii i Litvy. Taksama śćviardžałasia, što padčas pieramoŭ abmiarkoŭvałasia vajna va Ukrainie i rasijskaja vajskovaja i ekanamičnaja padtrymka Irana.

Pry hetym kiraŭnik Ofisa prezidenta Ukrainy Kiryła Budanaŭ havaryŭ, što hałoŭnaj temaj sustrečy Retklifa ŭ Maskvie byli adnosiny pamiž ZŠA i Rasijaj, a pytańnie zaviaršeńnia vajny va Ukrainie było tolki adnym z abmierkavanych pytańniaŭ.

Kamientary da artykuła