Kiraŭnik CRU prylataŭ u Maskvu, kab papiaredzić Rasiju ab niedapuščalnaści ataki na krainy Bałtyi — Politico
Navina pra pajezdku Džona Retklifa ŭ Rasiju vyklikała buru zdahadak u śviecie, bo heta była pieršaja viadomaja pajezdka dyrektara CRU ŭ stalicu Rasii pry prezidencie Donaldzie Trampie. Papiaredni raz kiraŭnik CRU prylataŭ u Maskvu piać hadoŭ tamu, kab papiaredzić Kreml pra niedapuščalnaść uvarvańnia va Ukrainu. Tady heta było biezvynikova.
Dyrektar CRU Džon Retklif na hetym tydni tajemna naviedaŭ Maskvu i papiaredziŭ rasijskija ŭłady ab niedapuščalnaści eskałacyi suprać sajuźnikaŭ ZŠA pa NATO, najpierš Estonii, Łatvii i Litvy. Pra heta sa spasyłkaj na dźvie krynicy, znajomyja z chodam pieramoŭ, paviedamlaje Politico.
«Sustreča była ŭ pieršuju čarhu pryśviečanaja papiaredžańniu Rasii suprać lubych eskałacyjnych dziejańniaŭ u dačynieńni da krain Bałtyi», — paviedamiła adna z krynic vydańnia.
Jak adznačaje Politico, vizit kiraŭnika CRU ŭ rasijskuju stalicu adbyŭsia biez papiaredniaha abviaščeńnia. Heta pieršaja viadomaja pajezdka kiraŭnika amierykanskaj raźviedki ŭ Maskvu padčas ciapierašniaha prezidenctva Donalda Trampa.
Pra toje, što Retklif padčas pajezdki papiaredžvaŭ Maskvu ab mahčymym napadzie na krainy NATO, raniej paviedamiła i Wall Street Journal. Vydańnie, adnak, nie ŭdakładniała, jakija mienavita krainy byli hałoŭnaj temaj razmovy. Politico śćviardžaje, što asablivaja ŭvaha była nadadzienaja Estonii, Łatvii i Litvie.
Pavodle źviestak vydańnia, Retklif taksama vykarystaŭ pajezdku dla cisku na Maskvu z patrabavańniem skaracić vajennuju i ekanamičnuju padtrymku Irana. Jon zaklikaŭ Rasiju spynić pieradaču Iranu zbroi i abaronnych technałohij.
Vizit adbyŭsia na fonie ŭzmacnieńnia napružanaści pamiž Rasijaj i krainami NATO. U apošnija tydni Maskva rabiła šerah pahroz u adras dziaržaŭ aljansu, jakija padtrymlivajuć Ukrainu. Na Zachadzie heta vyklikała aściarohi, što Rasija moža ŭzmacnić hibrydnyja ataki — dyviersii i kibierataki — abo navat pajści na abmiežavanyja vajennyja dziejańni suprać adnoj z krain NATO.
Pry hetym pavodle Statuta NATO ŭzbrojeny napad na adnaho člena aljansu razhladajecca jak napad na ŭsich.
Rasija, adnak, užo šmat hadoŭ vykarystoŭvaje suprać zachodnich krain mietady, jakija nie dasiahajuć paroha adkrytaj vajny i dazvalajuć paźbiahać pramoha vajennaha adkazu, adznačaje Politico.
Sam Donald Tramp u intervju ranicaj 26 žniŭnia admaŭlaŭ, što hałoŭnaj metaj pajezdki Retklifa było pierakanańnie Uładzimira Pucina nie vypraboŭvać NATO na tryvałaść abo nie atakavać Vialikabrytaniju. Jon nazvaŭ pajezdku kiraŭnika CRU «napaŭrucinnaj», ale pryznaŭ, što jana była źviazanaja sa sprobami spynić vajnu va Ukrainie.
«Ja nienavidžu rasčaroŭvać ludziej. My chacieli b ubačyć kaniec vajny va Ukrainie», — zajaviŭ Tramp.
Kreml aficyjna nie raskryvaŭ padrabiaznaści vizitu. Pavodle paviedamleńniaŭ rasijskaha boku, Pucin z Retklifam nie sustrakaŭsia, a kiraŭnik CRU pryjazdžaŭ u Rasiju dla kantaktaŭ pamiž śpiecsłužbami.
Cikavaja detal: vajskovy samalot C-17, na jakim Retklif prylacieŭ u Maskvu, pierad hetym vylecieŭ z Łatvii, śviedčać adkrytyja dadzienyja adsočvańnia palotaŭ.
Politico nahadvaje, što heta ŭžo nie pieršy vizit kiraŭnika CRU ŭ Maskvu napiaredadni surjoznaj eskałacyi.
U listapadzie 2021 hoda tahačasny dyrektar CRU Uiljam Biorns pryjazdžaŭ u rasijskuju stalicu, kab papiaredzić Pucina suprać poŭnamaštabnaha ŭvarvańnia va Ukrainu. Praz try miesiacy Rasija pačała vajnu.
Ciapierašni vizit Retklifa adbyvajecca ŭ momant, kali rasijska-ŭkrainskaja vajna nie nabližajecca da zaviaršeńnia, a Maskva i Kijeŭ uzmacniajuć dalokija ŭdary dronami i rakietami. Adnačasova, jak paviedamlaje Politico, Tramp usio bolš rasčaroŭvajecca ŭ Pucinie, pakolki jamu nie ŭdajecca vykanać abiacańnie chutka spynić vajnu.
Ciapier čytajuć
KDB zapuściŭ novy bot u telehramie dla viarboŭki biełarusaŭ za miažoj. Prapanujuć rasklejvać ulotki, fatahrafavać abjekty i «niešta inšaje»7
Kamientary
))))