Prezident Łatvii: Ryzyka pramoha ŭvarvańnia Rasii zastajecca nizkaj
«Uzrovień vajennaj pahrozy i jaje acenka nie źmianilisia», — kaža Edhar Rynkievič.
Prezident Łatvii Edhar Rynkievič prakamientavaŭ aktualnuju situacyju z nacyjanalnaj biaśpiekaj paśla taho, jak suśvietnyja miedyja paviedamili: kiraŭnik Centralnaha raźviedvalnaha ŭpraŭleńnia ZŠA Džon Retklif padčas pajezdki ŭ Maskvu pieraściaroh Rasiju ad napadu na krainy Bałtyi, piša Delfi.lv.
«Pra aktualnaje. Uzrovień vajennaj pahrozy i jaje acenka nie źmianilisia. Zaraz ryzyka pramoha ŭvarvańnia Rasii zastajecca nizkaj. Pa-raniejšamu mahčymyja roznyja dyviersii, kibierataki i hibrydnyja apieracyi. Faktyčna Łatvija i inšyja krainy NATA i ES rehularna sutykajucca ź imi. Jak struktury sistemy ŭnutranych spraŭ, tak i Nacyjanalnyja ŭzbrojenyja siły i sajuźniki pa NATA prymajuć miery dla praduchileńnia padobnych dziejańniaŭ. My vysoka aceńvajem palityčnyja, dypłamatyčnyja i vajennyja namahańni sajuźnikaŭ pa NATA, u tym liku ZŠA, nakiravanyja na ŭmacavańnie rehijanalnaj biaśpieki», — havorycca ŭ paviedamleńni Rynkieviča ŭ sacyjalnych sietkach.
Jak užo paviedamlałasia, dyrektar Centralnaha raźviedvalnaha ŭpraŭleńnia ZŠA Džon Retklif padčas vizitu ŭ Maskvu pieraściaroh rasijskich čynoŭnikaŭ ad eskałacyi kanfliktu z NATA, asabliva z Estonijaj, Łatvijaj i Litvoj, zajavili ŭ sieradu internet-vydańniu Politico dźvie daśviedčanyja krynicy.
«Hałoŭnaj metaj vizitu Retklifa było pieraścierahčy ad eskałacyjnych dziejańniaŭ suprać krain Bałtyi», — paviedamiła adna z krynic. Druhaja krynica dadała, što dyrektar CRU taksama sprabavaŭ pierakanać Maskvu skaracić vajennuju i ekanamičnuju padtrymku Irana.
Raniej u sieradu hazieta The Wall Street Journal taksama paviedamiła, što Retklif pieraściaroh Rasiju ad napadu na krainy — členy NATA.
Ministerstva klimatu i enierhietyki Łatvii pradstaviła na ŭzhadnieńnie prajekt rasparadžeńnia Kabinieta ministraŭ, jaki praduhledžvaje abviaščeńnie da 1 śniežnia nadzvyčajnaj situacyi ŭ śfierach achovy zdaroŭja, enierhazabieśpiačeńnia i vodnaj haspadarki va ŭschodnim pamiežžy Łatvii.
Ministerstva abhruntoŭvaje heta pahrozaj eskałacyi vajennych dziejańniaŭ z boku Rasii, a taksama ŭsio čaściejšym vyjaŭleńniem bieśpiłotnych latalnych aparataŭ i inšych nieapaznanych abjektaŭ u pavietranaj prastory Łatvii abo pablizu dziaržaŭnaj miažy.
-
Amierykanka zadušyła traich svaich dziaciej. Ciapier za sudom nad joj sočyć uvieś śviet, a niekatoryja žančyny stali ŭ jaje abaronu
-
Tramp choča, kab Pucin dapamoh jamu razbłakavać Armuzski praliŭ
-
Stan zdaroŭja 89‑hadovaha karala Narviehii rezka pahoršyŭsia, usia karaleŭskaja siamja sabrałasia ŭ špitali
Kamientary