Vypuścili novuju madel školnaha aŭtobusa «Nioman»
Minski zavod kołavych ciahačoŭ (MZKC) pradstaviŭ u Homieli novuju madel školnaha aŭtobusa «Nioman-420432». Prezientacyja adbyłasia padčas vystavy ŭ miežach abłasnoj piedahahičnaj kanfierencyi, paviedamiła pres-słužba pradpryjemstva.
Fota: mzkt.by
Aŭtobus stvorany na ŭłasnym šasi i pryznačany dla biaśpiečnaj i kamfortnaj pieravozki dziaciej. Jon abstalavany dyzielnym ruchavikom standartu Jeŭra-5 i miechaničnaj karobkaj pieradač, a jaho maksimalnaja chutkaść elektronna abmiežavanaja da 60 km/h.
Sałon raźličany na 28 dziaciej i dvuch supravadžajučych. Usie dziciačyja siadzieńni majuć čatyrochpunktavyja ramiani biaśpieki. Taksama aŭtobus atrymaŭ sistemy ABS, ESP, ASR i ROP, kandycyjanier, aciaplalniki, błakiroŭku dźviarej i śpiecyjalnyja znaki dla pieravozki dziaciej.
Dla kiroŭcy praduhledžanyja pnieŭmatyčnaje siadzieńnie z padahrevam, hidraŭzmacnialnik rula, ličbavaja panel pryboraŭ i abahravańnie lusterkaŭ.
U MZKC adznačyli, što novaja madel adaptavanaja mienavita dla pieravozki dziaciej i adpaviadaje patrabavańniam biaśpieki i kamfortu.
MZKC pačaŭ vypuskać aŭtobusy paśla nabyćcia ŭ 2014 hodzie AAT «Lidskija aŭtobusy «Nioman». Na bazie pradpryjemstva ŭ Lidzie ciapier vyrablajuć aŭtobusy siaredniaha i bujnoha kłasaŭ.
Čytajcie taksama:
U sankcyjny śpis ES uklučyli Biełaruskuju naftavuju kampaniju i «Vołat-Sanczian»
Jeŭrasajuz pryniaŭ 17‑y pakiet sankcyi suprać Rasii. U śpisie i Minski zavod kołavych ciahačoŭ