U Minsku praviaduć fiestyval mieksikanskaj kultury

5 vieraśnia Vierchni horad u Minsku znoŭ pieratvorycca ŭ miesca mieksikanskaha śviata. Fiestyval mieksikanskaj kultury na płoščy Svabody budzie prachodzić z 12:00 da 22:00. Haściam abiacajuć tematyčnyja placoŭki, fotazony, majstar-kłasy, mieksikanskuju kuchniu i kancertnuju prahramu.

Na praciahu dnia možna budzie bližej paznajomicca z tradycyjami Mieksiki. Dla naviedvalnikaŭ padrychtavali roznyja tvorčyja i siamiejnyja aktyŭnaści. Na majstar-kłasach pakažuć, jak robicca tradycyjnaja pińjata, paznajomiać z mastactvam drukavanaj hrafiki i prapanujuć stvaryć ułasnyja jarkija maski ŭ mieksikanskim styli.

U Domie Vańkovičaŭ z 5 pa 11 vieraśnia budzie pracavać fotavystava «Mieksika: narod, duša i tradycyi». Na joj pradstaviać raboty 16 mieksikanskich fatohrafak, jakija praz svaje zdymki pakazvajuć žyćcio, śviaty, zvyčai i kulturnuju spadčynu svajoj krainy.

Asobnaja častka prahramy budzie pryśviečana mieksikanskaj kuchni. Minski šef-kuchar Arciom Rakiecki praviadzie kulinarny majstar-kłas, paśla jakoha možna budzie pakaštavać fruktovuju sałatu ŭ mieksikanskim styli z vostrym piercam. Pieršymi jaje pasprabujuć hości ŭ sambrera abo tradycyjnym mieksikanskim adzieńni.

Na fud-korcie buduć prapanoŭvać takas birryja i al pastar, kiesadylji, burytas, načas z huakamole, mieksikanskuju kukuruzu z łajmam i čyli. Na desiert — čuras i marožanaje ź niezvyčajnymi smakami: avakada i łajm, manha z vendžanym piercam čypatle, a taksama tradycyjny desiert tres leches. Z napojaŭ možna budzie pasprabavać tiepače i napoj z hibiskusa.

Vialiki kancert pačniecca ŭ 20:00. Na scenie vystupiać muzyčnyja i tancavalnyja kalektyvy, a hałoŭnaj muzyčnaj admietnaściu viečara stanuć maryjačy.

Fiestyvalnaja tematyka budzie praciahnutaja i ŭ restaranach «Bulbašy» na płoščy Svabody i vulicy Hiercena. 5 i 6 vieraśnia tam prapanujuć śpiecyjalnaje mieniu ź mieksikanskimi matyvami: draniki z huakamole i vendžanaj viciebskaj stronhaj, kiesadylji z kačkaj, takas z bulbianoj kašaj i jałavičynaj. 

Kamientary da artykuła