Biełaruskija muzyki Ajłar Tatarenka i Mikita Arłoŭ za 40 dzion stvaryli biełaruskamoŭnuju prahramu dla Burning Man. Praŭda, u pustyniu Nievady palacić tolki Ajłar, Mikitu praz prablemy z dakumientami zamienić jaho kardonnaja hałava.
Svoj mini-albom, ź jakim pajeduć na mižnarodny fiestyval Burning Man, Ajłar Tatarenka (Mnogolun) i Mikita Arłoŭ (Applepicker) prezientavali 23 žniŭnia ŭ varšaŭskim kłubie SPATiF.
U pustyniu Błek-Rok palacić tolki Ajłar. Mikita (jon taksama adzin sa stvaralnikaŭ hurta «Sajuz») praz prablemy z dakumientami zastaniecca ŭ Varšavie, ale naparnica ŭsio roŭna źbirajecca ŭziać jaho z saboj. Praŭda, u vyhladzie razdrukavanaj kardonnaj hałavy na pałačcy.
«Ja chaču jechać z hetaj hałavoj, kab adčuvać, što Mikita sa mnoj. Ja budu ź joj vystupać», — kaža Ajłar.
40 dzion na biełaruski set
Ajłar i Mikita ŭžo stvarali muzyku razam: dva hady tamu vyjšaŭ ich sumiesny trek KIM. Ciapier jany znoŭ abjadnalisia dziela ŭdziełu ŭ konkursie, pieramoha ŭ jakim dała im mahčymaść adpravicca sa svajoj muzykaj za akijan.
Padrychtoŭka išła ŭ šalonym tempie. Usiaho prykładna za 40 dzion muzyki stvaryli ceły set biełaruskamoŭnych piesień śpiecyjalna dla fiestyvalu.
Klučavym sinhłam, ź jakim duet pieramoh u konkursie, staŭ enierhičny trek «Ci ŭ bok?».
Pa słovach Ajłar, heta pieśnia pra paźbiahajučy typ pryviazanaści, tyja samyja emacyjnyja «dahaniałki», kali adzin čałaviek imkniecca da blizkaści, a druhi addalajecca.
Cikava, što pačałasia pieśnia faktyčna ŭ łožku. Ajłar raskazvaje, što časam pierad snom čuje ŭ hałavie huk, harmoniju abo spałučeńnie hukaŭ i ŭžo nie moža zasnuć, pakul nie zafiksuje ich.
Tak adbyłosia i hetym razam: miełodyja pryjšła nočču, tamu śpiavačcy daviałosia ŭstać, uziać dyktafon i amal šeptam zapisać ideju, kab nie razbudzić chatnich.
Dla Ajłar heta naturalny sposab stvareńnia muzyki: pieśni naradžajucca z taho, što jana sama ŭ hety momant pražyvaje, a paśla asabisty dośvied źmiešvajecca ź biełaruskaj movaj, kulturnymi vobrazami i muzyčnymi ekśpierymientami.
Ciotka i sireny za aknom
Mistyčnaja historyja staić za trekam «Ciotka». Spačatku pieśnia pryjšła da Ajłar sama saboj. Paźniej dziaŭčyna pačała čytać tvory biełaruskaj paetesy Ałaizy Paškievič, viadomaj pad psieŭdanimam Ciotka, i zrazumieła, što vobraz, jaki naradžaŭsia ŭ pieśni, dziŭnym čynam pierahukajecca ź jaje tekstami.
Potym vyśvietliłasia jašče adno supadzieńnie: dzień naradžeńnia Ałaizy Paškievič 15 lipienia, a pracu nad trekam muzyki zakančvali litaralna ŭ hetyja ž dni.
Padčas zapisu za voknami išoŭ mocny doždž, pa horadzie jeździli pažarnyja mašyny, a huki ich siren traplali ŭ mikrafony. Zamiest taho kab pazbavicca ad vypadkovaha šumu, Mikita zapisaŭ jaho, i sireny ŭ vyniku stali častkaj kampazicyi.
Dla Ajłar hetyja supadzieńni skłalisia ŭ adnu historyju.
«Mnie zdajecca, što heta prosta duch Ałaizy. U hetym časie i prastory jon tak prajaviŭsia», — raskazvaje jana.
Nie tolki ŭłasnyja pieśni
Razam z novym materyjałam Ajłar płanuje vykanać u pustyni i pieśni znajomych biełaruskich muzykaŭ: «Taju» Uładzia Lepiašynskaha i «Sonca» hurta Pau Siul.
Pry hetym śpiavačka nie choča prosta ŭklučyć hatovuju fanahramu i praśpiavać pavierch jaje.
«Nie chočacca rabić prosta kavier, jak byccam ty Winamp-płejer», — žartuje Ajłar.
Muzyki padzialilisia ź joj svaimi kancertnymi płejbekami, ale kampazicyi jašče mohuć atrymać ułasnaje pračytańnie.
Zapiski z Varšavy — u pustyniu
I ŭsio ž Ajłar paviazie ŭ Błek-Rok nie tolki muzyku i kardonnaha Mikitu.
Padčas prezientacyi ŭ SPATiF hledačy pakidali simvaličnyja zapiski. Ich śpiavačka płanuje zabrać z saboj u ZŠA i pakinuć u Chramie Burning Man.
Chram — adna z samych emacyjnych prastoraŭ Black Rock City. Siudy prychodziać, kab uspomnić ludziej i padziei, padziakavać, raźvitacca abo pakinuć toje, što chočacca adpuścić. A ŭ apošni viečar Chram spalvajuć.
Takim čynam, zapiski, pakinutyja ŭ varšaŭskim kłubie, skončać svoj šlach za tysiačy kiłamietraŭ ad Varšavy — u ahni pasiarod pustyni Nievady.
Što takoje Burning Man
Burning Man — štohadovaja mižnarodnaja padzieja ŭ pustyni Błek-Rok u štacie Nievada, ZŠA. Na niekalki dzion dziasiatki tysiač udzielnikaŭ stvarajuć pasiarod pustyni časovy horad Black Rock City, a paśla zakančeńnia padziei raźbirajuć jaho. U 2026 hodzie Burning Man projdzie z 30 žniŭnia pa 7 vieraśnia, a temaj stanie Axis Mundi — vobraz suśvietnaj vosi, jakaja ŭ roznych kulturach złučaje ziamnoje i niabiesnaje.
Burning Man heta nie zusim fiestyval u zvykłym sensie, dzie artysty vystupajuć, a astatnija zastajucca hledačami. Jaho kultura pabudavanaja vakoł niepasrednaha ŭdziełu: ludzi pryvoziać u pustyniu mastackija instalacyi, stvarajuć pierformansy i tematyčnyja łahiery, ładziać muzyku i sami budujuć žyćcio časovaha horada.
Adzin z hałoŭnych simvałaŭ padziei — vielizarnaja fihura The Man, jakuju spalvajuć u kancy tydnia. Asobnaje miesca zajmaje i Chram: prastora pamiaci, refleksii i raźvitańnia.
Siarod tematyčnych łahieraŭ Black Rock City sioleta znoŭ budzie i biełaruski MARA. Jany debiutavali ŭ minułym hodzie i ździŭlali inšaziemcaŭ łaźniaj i dranikami. Sioleta jany viartajucca ŭ pustyniu ŭžo z supolnaściu prykładna z 60 čałaviek.
Ciapier čytajuć
Hety małady biełarus stajaŭ la vytokaŭ ChatGPT. Voś što jon zrabiŭ1
Kamientary