U Biełarusi pačali šyć zimovuju vopratku dla cialat

Na Antopalskaj vatna-pradzilnaj fabrycy ŭ Drahičynskim rajonie pačali vypuskać ucieplenyja zimovyja papony dla cialat. Ideja źjaviłasia paśla minułaj zimy, kali mocnyja marazy prymusili haspadarki šukać dadatkovyja sposaby abaranić maładniak ad pieraachaładžeńnia, piša BiełTA.

Fota: BiełTA

Dla papon vykarystoŭvajuć biełaruskija materyjały ŭłasnaj vytvorčaści. Taŭščyniu ŭciaplalnika padbirajuć u zaležnaści ad tempieratury: dla ŭmoŭ da —5 hradusaŭ padychodzić bolš tonki płast, a dla mocnych marazoŭ vyrablajuć bolš ciopłyja varyjanty. U jakaści ŭciaplalnika vykarystoŭvajuć ihołkaprabiŭny materyjał abo sintepon roznaj taŭščyni.

Vierchni płast robiać z vodaniepranikalnaj tkaniny, jakaja abaraniaje žyviolinu ad vilhaci, a ŭnutrany — z bavaŭnianaha materyjału. Važna, kab papona była miakkaj i nie razdražniała skuru cialaci. Materyjały, jakija mohuć stvarać «parnikovy efiekt», vyklikać pierahreŭ i mocnaje potaadździaleńnie, vykarystoŭvać nie buduć. Dla zručnaści papony majuć zaščepki-fiksatary i rehulavanyja ramiani.

Asabliva patrebnaja takaja abarona novanarodžanym cialatam. U pieršy miesiac žyćcia ich sistema termarehulacyi jašče niedastatkova raźvitaja, tamu jany chutčej pieraachałodžvajucca abo pierahravajucca. Ucieplenaja papona dapamahaje pamienšyć straty enierhii na padtrymańnie tempieratury cieła i zachavać bolš resursaŭ dla rostu.

Adnačasova ŭ Bresckaj vobłaści rychtujucca da novaha chałodnaha siezona i palapšajuć umovy ŭtrymańnia maładniaku. U 2026 hodzie tut płanujuć pabudavać 36 i rekanstrujavać jašče 17 prafiłaktoryjaŭ dla cialat. Miarkujecca, što da 2027 hoda ŭsio pahałoŭje cialat u rehijonie budzie ŭtrymlivacca ŭ sučasnych umovach.

Kamientary da artykuła