Deputaty vypadkova źlili dakumient pra katastrafičny padziež žyvioły ŭ sielskich haspadarkach
U aficyjnym telehram-kanale Pałaty pradstaŭnikoŭ pamyłkova apublikavali dakumient, pryśviečany padziažu bujnoj rahataj žyvioły i ptuški ŭ sielskich haspadarkach Viciebskaj vobłaści za pieršaje paŭhodździe 2026 hoda. «Naša Niva» ŭvažliva vyvučyła hetyja ličby.
Dziasiatki tysiač karoŭ i miljony ptušak
Całkam dakumient nazyvajecca «Infarmacyja pa pytańni pra zachavanaść bujnoj rahataj žyvioły i ptuški ŭ sielskahaspadarčych arhanizacyjach vobłaści za pieršaje paŭhodździe 2026 hoda».
Zhodna z unutranaj statystykaj, tolki za šeść miesiacaŭ 2026 hoda ŭ Biełarusi pała 76,6 tysiačy hałoŭ bujnoj rahataj žyvioły. Heta na 2,4 tysiačy bolš, čym za anałahičny pieryjad minułaha hoda. Pa pakazčyku technałahičnych strat najhoršaja situacyja ŭ Homielskaj i Mahiloŭskaj abłaściach.
Asnoŭnaja ŭvaha ŭ źlitym dakumiencie nadajecca Viciebskaj vobłaści. Bolš za ŭsio ŭražvajuć ličby pa svojskaj ptušcy. Niahledziačy na toje, što niebiaśpiečnych epidemij sioleta nie rehistravałasia, padziež ptuški za paŭhoda skłaŭ 2 miljony 74,9 tysiačy hałoŭ (heta na 92,3 tysiačy bolš, čym letaś).
Na papiery pakazana źnižeńnie padziažu na 1,9 tysiačy hałoŭ bujnoj rahataj žyvioły, praŭda, usio roŭna straty nie daciahnuli da metavych 1,7%. Adnak aŭtary dakumienta zadajuć niazručnaje pytańnie: ci nie źviazana hetaje «cudoŭnaje acaleńnie» viciebskaha statka z tym, što Łukašenka pajšoŭ nasustrač hubiernataru, abaraniŭ ahraryjaŭ ad žorstkaha kantrolu orhanaŭ KDK i realny stan spraŭ staŭ fiksavacca nie tak praŭdziva?
Jašče adna schiema, pra jakuju raspaviadaje dakumient — heta ŭtylizacyja žyvioły na miasapierapracoŭčych pradpryjemstvach, na jakuju prypadaje 7,4% ad ahulnaj kolkaści padziažu. U dakumiencie razvažajuć, ci heta nie lehalizavany kanał schavanaha padziažu, kali zamiest taho, kab fiksavać śmierć karovy na fiermie, žyviołu ŭ ahonii terminova viazuć na pierapracoŭku, kab štučna zanizić statystyku śmiarotnaści.
Pahroza deficytu małaka i jałavičyny
44% ad usich pamierłych žyvioł — heta cialaty va ŭzroście da 2 miesiacaŭ. Ich hibiel vyklikana nie składanymi chvarobami, a adsutnaściu narmalnaha dohladu, drennym karmleńniem i nievykanańniem schiem vakcynacyi. Što tyčycca darosłych karoŭ (32% ad padziažu), to ich hałoŭnaja pryčyna śmierci — niezbałansavanaść karmleńnia ŭ suchastojny pieryjad, siłasna-kancentratny typ karmleńnia, vykarystańnie vialikaj kolkaści kancentrataŭ.
Aŭtary dakładu pišuć: masavaja strata maładniaku aznačaje, što arhanizacyi źniščajuć svoj budučy patencyjał dla zamieny dojnaha statka. «Bieź likvidacyi hetaj prablemy ŭžo ŭ siarednieterminovaj pierśpiektyvie vobłaść sutykniecca z žorstkim deficytam małaka i jałavičyny», — adznačana ŭ dakładzie.
«Uzakonieny» padziež u rajonach
U niekatorych rajonach situacyja ŭvohule katastrafičnaja. Technałahičnyja straty istotna pieravyšajuć normu ŭ Šumilinskim (3,5%), Vierchniadźvinskim (2,9%), Haradockim i Tałačynskim (pa 2,7%) rajonach.
Alaksandr Łukašenka nieadnarazova łajaŭ čynoŭnikaŭ za hetuju prablemu. Jon nazyvaŭ padziež u chałady «maralnaj vyrodlivaściu»: «U kantoru staŭcie cialat. I hinuć jany ad biezhaspadarčaści».
Kab vypravić situacyju, u dakumiencie prapanujecca «pierajści ad papiarovaha kantrolu da realnych mier»:
- pravodzić raptoŭnyja pravierki vieterynarnych łabaratoryj, kab spynić utojvańnie realnych dyjahnazaŭ i skažeńnie statystyki,
- nakiravać u prablemnyja kałhasy mabilnyja hrupy z vopytnych vieterynaraŭ i zaatechnikaŭ,
- uvieści žorstki dyktat technałahičnaha rehłamientu dla cialat i pravieryć, kudy nasamreč iduć biudžetnyja hrošy, vydzielenyja na vietpreparaty i dabaŭki.
Naprykancy dakumient stavić jašče adno vostraje pytańnie: jak zabiaśpiečyć nabor abituryjentaŭ na metavaje navučańnie ŭ ahrarny siektar u 2027 hodzie?
«Naša Niva» — bastyjon biełaruščyny
PADTRYMAĆ-
Minčuk źniaŭ rolik pra čarhu ŭ paliklinicy, dzie było bolš za 150 čałaviek. Za heta na jaho napisali zajavu ŭ milicyju
-
Julijana Šamietaviec z «Kibierpartyzanaŭ» stała maci — raskazvaje pra dekretny adpačynak u ZŠA i toje, ci sapraŭdy možna sumiaščać pracu z maciarynstvam
-
Kavieryn vybačyŭsia za prapanovu eratyčnaj fotasiesii dla Cichanoŭskaj
Minčuk źniaŭ rolik pra čarhu ŭ paliklinicy, dzie było bolš za 150 čałaviek. Za heta na jaho napisali zajavu ŭ milicyju10
Kamientary
Norma - 1,7% i pa respublicy 1,7%.
Pavialičany padiež u Viciebskaj vobłaści? U čym siensacyja? Žorstkaja zima voś i vynik. Jaki niebudź analiz sprabavali sami zrabić?
S ptuškaj taksama moža być takaja pryčyna. Zaraz u Francyi hinuć miljonami, utylizujuć adrazu na fiermach, što nieprymalna, ale što rabić?
Tak, zrazumieła, treba pakazvać jak kiepska režym kiruje haspadarkaj. Ale treba analizavać i vyśviatlać pryčyny - dzie fakap kiraŭnictva, a dzie pryrodnaja katastrofa i abjektyŭny faktar. Budzie bolš prafiesianalna i bolš davieru.
U artykułu pišacie, što padiež pieravyšaje normu, i tut ža publikujecie dakumient, dzie padiež adpaviadaje normie. Navošta ludziam hołavu duryć i (nie)naŭmysna chłusić čytačam? My i tak viedajem jaka nieefiektyŭna režym pracuje.