Kapitan łondanskaj futbolnaj kamandy staŭ karalom va Uhandzie

36‑hadovy Džordž Desmond Kamurasi, bramnik i kapitan amatarskaj futbolnaj kamandy Si-Dons z paŭdniova-ŭschodniaha Łondana, staŭ novym karalom naroda Tora va Uhandzie, paviedamlaje The Telegraph.

Džordž Kamurasi. Fota: vanguardngr.com

Na praciahu karjery Kamurasi, jaki naradziŭsia i vyras u Vialikabrytanii, hulaŭ za paŭprafiesijnyja i amatarskija anhlijskija kłuby Chiern-Bej, Krojdan i Ešfard Junajted. Ciapier jon vystupaje za Si-Dons, jakaja hulaje ŭ dziaviatym dyvizijonie Anhlii.

Novym amukamaj — karalom Tora — Kamurasi abrali paśla śmierci jaho stryječnaha brata Oja Ńjimby Kabamby Ihuru Rukidzi IV. Toj pamior 27 žniŭnia paśla lačeńnia ad ankałahičnaha zachvorvańnia, a ŭznačaliŭ karaleŭstva jašče ŭ 1995 hodzie, kali jamu było ŭsiaho try hady.

Kamitet pa karaleŭskaj spadčynie, jaki składajecca z 21 čałavieka, užo pryniaŭ rašeńnie adnosna novaha kiraŭnika. Aficyjna pra jaho abrańnie pavinny abviaścić na nastupnym tydni.

Novy status nie prymusiŭ Kamurasi admovicca ad futboła. Niadaŭna jon dapamoh Si-Dons paśpiachova debiutavać u Kubku Anhlii i vyjści ŭ druhi kvalifikacyjny raŭnd, dzie kamanda pieramahła kamandu «Eryt Taun» ź likam 2:0.

Karaleŭstva Tora znachodzicca na zachadzie Uhandy i źjaŭlajecca adnym z čatyroch tradycyjnych karaleŭstvaŭ krainy. Pasada amukamy siońnia maje pieravažna kulturnaje, a nie palityčnaje značeńnie.

Kamientary da artykuła