Niderłandy pajšli pa šlachu Trampa — płanujuć vysyłać mihrantaŭ va Uhandu

Jak paviedamiŭ ministr mihracyi i zamiežnych spraŭ Niderłandaŭ Devid van Vieł u intervju Financial Times, užo ŭ nastupnym hodzie va Uhandzie moža zapracavać «tranzitny centr», kudy buduć nakiroŭvać ludziej. Niahledziačy na ŭpeŭnienaść urada ŭ zakonnaści svaich dziejańniaŭ, ministr pryznaŭ, što prajekt sutykniecca ź jurydyčnymi vyklikami.

«Pahadnieńnie adpaviadaje mižnarodnamu, jeŭrapiejskamu i našamu nacyjanalnamu zakanadaŭstvu… Ale, biezumoŭna, spačatku jano budzie asprečana ŭ sudzie, i tady my ŭbačym, ci vytrymaje jano pravierku», — zajaviŭ van Vieł.

Klučavym aśpiektam pahadnieńnia, pa słovach ministra, źjaŭlajecca zachavańnie pravoŭ čałavieka. Dla kiravańnia centram na miescy płanujecca pryciahnuć profilnyja mižnarodnyja arhanizacyi — Ahienctva AAN pa spravach biežancaŭ i Mižnarodnuju arhanizacyju pa mihracyi.

Jak adznačaje FT, niderłandskaja inicyjatyva nie źjaŭlajecca ŭnikalnaj. Jana nahadvaje pahadnieńnie, zaklučanaje prezidentam Donaldam Trampam z Uhandaj u žniŭni hetaha hoda. Pa im Kampała pahadziłasia prymać asob, jakim admovili ŭ prytułku ŭ ZŠA. Adnak isnuje pryncypovaje adroźnieńnie: Vašynhton nie płanavaŭ pryciahvać da pracesu nijakija ahienctvy AAN.

Uhanda, sa svajho boku, vystaviła ŭmovy: kraina hatovaja prymać vychadcaŭ z Afryki biez sudzimaściej, jakija nie buduć vykarystoŭvać terytoryju Uhandy dla palityčnaha aktyvizmu. Niepaŭnaletnija biez supravadžeńnia darosłych i asoby z kryminalnym minułym pad dziejańnie prahramy nie padpaduć.

Asobna było adznačana, što pradstaŭnikoŭ ŁHBTK+ supolnaści nie buduć vysyłać va Uhandu, kab abaranić ich ad dyskryminacyjnych zakonaŭ hetaj krainy, dzie za homasieksualnyja adnosiny praduhledžana pažyćciovaje źniavoleńnie ci navat śmiarotnaje pakarańnie.

Hałoŭnaja meta prajekta — stvaryć efiektyŭny miechanizm viartańnia mihrantaŭ, jakija nie majuć prava zastavacca ŭ Jeŭropie. Pavodle danych Jeŭrakamisii, tolki kala 20% asob, jakim admovili ŭ prytułku ŭ ES, viartajucca na radzimu.

«Nam treba harantavać, što ludzi, jakija nie majuć prava zastavacca tut, u Jeŭropie… sapraŭdy źjazdžajuć», — skazaŭ van Vieł.

Pavodle zadumy ministra, piłotny prajekt budzie ŭ pieršuju čarhu nakiravany na vychadcaŭ z krain, što miažujuć z Uhandaj, abo znachodziacca pobač.

Mienavita hety fakt i stavić pad sumnieŭ efiektyŭnaść usiaho pahadnieńnia. Reč u tym, što aficyjnaja statystyka pakazvaje: asnoŭnyja hrupy mihrantaŭ, jakich Niderłandam nie ŭdajecca viarnuć na radzimu, pachodziać zusim ź inšych krain: Ukrainy, Turcyi, Ałžyra, Maroka i Siryi.

U adkaz na heta ministr zajaviŭ, što prajekt maje nie tolki praktyčnuju, ale i psichałahičnuju metu — stać «strymlivajučym faktaram». «Kali vam admovili ŭ prytułku, vy pavinny źjechać dobraachvotna. Kali nie, to vas adpraviać va Uhandu», — rastłumačyŭ jon, dadaŭšy, što ludzi «stanoviacca bolš hatovymi da supracoŭnictva, kali ŭžo znachodziacca za miežami Jeŭropy».

Pravaabaroncy i šerah ekśpiertaŭ pa mihracyi raskrytykavali padobnyja schiemy, vykazvajučy zaniepakojenaść mahčymymi parušeńniami pravoŭ čałavieka. Na dumku krytykaŭ, było b značna bolš efiektyŭna ŭkładać srodki ŭ raźvićcio mihracyjnaj infrastruktury niepasredna ŭ Jeŭropie.

Ministr van Vieł admoviŭsia nazvać, u jakuju sumu abydziecca stvareńnie «tranzitnaha centra» va Uhandzie.

Jak adznačaje FT, Niderłandy stali druhoj krainaj ES, jakaja zaklučyła padobnaje pahadnieńnie z treciaj krainaj. Pieršaj była Italija, jakaja ŭžo nakiroŭvaje mihrantaŭ u śpiecyjalny centr u Ałbanii. Heta śviedčyć pra ahulnajeŭrapiejski trend na ŭzmacnieńnie žorstkaści mihracyjnaj palityki.

• 7
• 0
• 0
• 0
• 2
• 0
• 0
• 1