Pa centry Minska skačuć rycary, a ratavalniki biehajuć praz dym. Jak u stalicy śviatkujuć Dzień horada ŠMAT FOTA

Siońnia Minsku 959 hadoŭ. Hałoŭnyja placoŭki sabrali ŭ centry: kala Pałaca sportu prachodziać kancerty i pracuje kirmaš, u parku Pieramohi spaborničajuć ratavalniki, a na zialonaj zonie kala skryžavańnia praśpiektaŭ Pieramožcaŭ i Mašerava razharnuŭsia fiestyval histaryčnaj rekanstrukcyi. Vydańnie «Anłajnier» pahladzieła, što tam adbyvajecca ŭdzień.

Śviatkavańnie Dnia horada pačałosia ŭ 10:00 z uskładańnia kvietak da abieliska «Minsk — horad-hieroj». Paśla aficyjnaj častki imprezy praciahnulisia ŭžo na inšych placoŭkach pa ŭsim horadzie.

Na fiestyvali «Minsk staražytny» pastavili šatry, raźviali vohniščy i vyvieli na placoŭku koniej. Na ahni hatujuć ježu, vakoł chodziać rekanstruktary ŭ adzieńni i formie roznych histaryčnych pieryjadaŭ.

Asobnaja častka prahramy — konnyja vystupleńni. Vieršniki ŭ daśpiechach prachodziać dystancyju ź dzidami i miačami, paražajuć mišeni i razyhryvajuć pajadynki. Biez padzieńniaŭ taksama nie abychodzicca: na adnym z vystupleńniaŭ udzielnik apynuŭsia na ziamli, u toj čas jak jahony koń praciahnuŭ ruch.

U parku Pieramohi prachodziać mižnarodnyja spabornictvy «Najmacniejšy ratavalnik-pažarnik». Udzielniki vychodziać na dystancyju ŭ ekipiroŭcy, padymajucca pa mietaličnaj kanstrukcyi, pracujuć z pažarnymi rukavami i prachodziać učastak z dymam. Za časam sočać elektronnyja tabło — lik idzie na siekundy.

A zaviaršyć Dzień horada płanujuć fiejervierkam u 23:00.

Kamientary da artykuła