Saudaŭskaja Aravija prypyniła pracu naftapravoda «Uschod — Zachad» paśla ataki dronaŭ z terytoryi Iraka. Pa im idzie 5% suśvietnaj nafty

Saudaŭskaja Aravija časova spyniła pracu adnaho z najvažniejšych u rehijonie naftapravodaŭ «Uschod — Zachad» paśla ataki bieśpiłotnikaŭ, zapuščanych z terytoryi Iraka. Hety naftapravod dazvalaje Er-Ryjadu transpartavać naftu ŭ abychod Armuzskaha praliva. Pavodle acenak, praź jaho prachodzić ad 4% da 5% suśvietnaha abjomu nafty, piša Reuters.

Spadarožnikavy zdymak, na jakim vidać nastupstvy ŭdaru pa naftapravodzie

Incydent adbyŭsia na fonie maštabnaha nastupleńnia jemienskich chusitaŭ, jakija padtrymlivajucca Iranam, uzdoŭž uźbiarežža Čyrvonaha mora. Chusity imknucca ŭziać pad kantrol Bab-el-Mandebski praliŭ — jašče adzin klučavy maršrut transpartavańnia nafty ź Blizkaha Uschodu.

Ułady Iraka paćvierdzili, što drony byli zapuščanyja z pravincyi Majsan, jakaja miažuje ź Iranam. Paśla ataki ad pasady adchilili adnaho ź irakskich vajskovych kamandziraŭ, jaki adkazvaje za apieracyi ŭ hetaj pravincyi. U Bahdadzie zajavili, što rasśledujuć zdareńnie.

Saudaŭskija ŭłady nazvali prypynieńnie pracy naftapravoda mieraj zaściarohi. Adnak spadarožnikavyja zdymki pakazali ślady pažaru kala pompavaj stancyi pobač z Al-Miesbaa, a taksama husty dym u rajonie inšaj stancyi kala Al-Dekry.

Ministerstva zamiežnych spraŭ Saudaŭskaj Aravii paviedamiła, što ŭ vyniku ataki jość paciarpiełyja i naniesienyja materyjalnyja straty. Ich maštab pakul aceńvajecca.

Er-Ryjad zajaviŭ, što pakul nie płanuje ŭdaraŭ u adkaz i maje namier padtrymlivać namahańni Iraka, nakiravanyja na niedapuščeńnie padobnych atak u budučyni. Pry hetym Saudaŭskaja Aravija pakidaje za saboj prava pryniać nieabchodnyja miery dla abarony svajho suvierenitetu, biaśpieki, naftavaj infrastruktury i nasielnictva.

Naftapravod «Uschod — Zachad» praciahłaściu kala 1200 km złučaje naftavaje radovišča Abkajk z portam Janbu na ŭźbiarežžy Čyrvonaha mora. Jon vykarystoŭvajecca jak alternatyŭny maršrut dla ekspartu saudaŭskaj nafty, kali transpartavańnie praz Armuzski praliŭ stanovicca niemahčymym.

Značeńnie hetaha maršrutu ŭzrasło paśla taho, jak praz vajnu ZŠA ź Iranam faktyčna spyniŭsia ruch praz Armuzski praliŭ. Raniej praź jaho prachodziła kala piataj častki suśvietnaha naftavaha patoku.

Ataku asudziła i Rada supracoŭnictva arabskich dziaržaŭ Piersidskaha zaliva, u jaki ŭvachodziać AAE, Bachrejn, Aman, Katar i Kuviejt. Hienieralny sakratar arhanizacyi Džasiem Machamied Albudajvi nazvaŭ napad niebiaśpiečnaj eskałacyjaj i pahrozaj terytaryjalnaj cełasnaści i žyćciova važnym abjektam Saudaŭskaj Aravii.

Tym časam situacyja vakoł Bab-el-Mandebskaha praliva taksama abvastrajecca. Na hetym tydni chusity ŭ vyniku chutkaha nastupleńnia ŭ Jemienie ŭziali pad kantrol bolšuju častku ŭźbiarežža krainy. Pavodle krynic Reuters u jemienskim uradzie, 11 vieraśnia jany dasiahnuli vostrava Pierym — stratehična važnaha punkta, jaki dazvalaje kantralavać Bab-el-Mandebski praliŭ.

Supraćstajańnie pamiž Saudaŭskaj Aravijaj i chusitami abvastryłasia ŭ lipieni. Tady Er-Ryjad nanios udar pa aeraporcie ŭ stalicy Jemiena, jaki kantralujuć chusity, kab nie dapuścić pasadki iranskaha samalota z vysokapastaŭlenymi pradstaŭnikami chusitaŭ, jakija viartalisia z pachavańnia viarchoŭnaha lidara Irana Ali Chamieniei.

Kamientary da artykuła