Siamja Sachaščykaŭ rearhanizuje svoj biznes u Polščy

Častku kampanij i aktyvaŭ jany pieradali siamiejnamu fondu. Što heta za forma ŭłasnaści i što jana daje, patłumačyŭ u svaim kanale žurnalist Vadzim Siachovič.

Valeryj Sachaščyk. Fota: Naša Niva

Budaŭničy biznes Sachaščykaŭ pracuje ŭ Polščy i Hiermanii. Adna ź jaho asnoŭnych kampanij Sahaty vystupaje padradčykam i hienpadradčykam. Deviełapierskim kirunkam zajmajecca CUD Development, jakaja buduje ŭłasnyja žyłyja kompleksy. Ciapier u jaje partfieli dva prajekty: Osiedle Racławicka ŭ Mščonavie i Zakątek Chmielna ŭ Žyrardavie.

U lipieni ŭ hetym biznesie pačalisia prykmietnyja źmieny. Jak piša Vadzim Siachovič, Sachaščyki zarehistravali dźvie novyja kampanii — CUD Budownictwo i CH. Pieršaja taksama budzie zajmacca padradnymi pracami i razam z Sahaty i CUD Development uvajšła ŭ Grupa CUD. Pavodle samoj hrupy, ciapier u joj kala 300 supracoŭnikaŭ.

Adnačasova źmianiłasia i struktura ŭłasnaści. Mažarytarnym uładalnikam novaj CUD Budownictwo staŭ siamiejny fond (Fundacja rodzinna) Fundacja S. Na jaho ž pieraaformili CUD Development, jakaja raniej u roŭnych dolach naležała Valeru i Alehu Sachaščykam.

Navošta Sachaščykam siamiejny fond

Fundacja rodzinna źjaviłasia ŭ polskim zakanadaŭstvie ŭ 2023 hodzie. Jaje hałoŭnaje pryznačeńnie zaklučajecca ŭ stvareńni mahčymaści zachavać siamiejny biznes pry pierachodzie ad adnaho pakaleńnia da nastupnaha. Zasnavalnik zahadzia vyznačaje praviły kiravańnia majomaściu i vypłat členam siamji, što dazvalaje blizkim atrymlivać dachod biez abaviazkovaha ŭdziełu ŭ kiravańni kampanijaj.

Ekśpierty Anatol i Lidzija Ražkovy z ALG Legal tłumačać i inšyja pieravahi hetaj formy biznesu.

Kali dyvidendy atrymlivaje niepasredna fizičnaja asoba, paśla padatku na prybytak kampanii ŭźnikaje jašče i padatak pry vypłacie hrošaj ułaśniku. Siamiejny fond dazvalaje adkłaści hety druhi etap i atrymanyja im srodki pakidać unutry struktury i reinviestavać.

Naprykład, fond moža ŭkładvać ich u nieruchomaść, kaštoŭnyja papiery abo doli inšych kampanij. Padatak na ŭzroŭni fondu ŭźnikaje pry vypłacie srodkaŭ bienieficyjaram. Dla zasnavalnika i jaho najbližejšych svajakoŭ pry hetym dziejničajuć asobnyja lhoty.

Jašče adna asablivaść zaklučajecca ŭ tym, što pieradadzienaja fondu majomaść bolš nie jość asabistaj majomaściu jaho zasnavalnika. Heta ŭ peŭnaj stupieni abaraniaje jaje ad asabistych kredytoraŭ. Ale, jak padkreślivajuć ekśpierty, abarona nie absalutnaja. Fond moža adkazvać pa niekatorych abaviazacielstvach, jakija ŭźnikli da jaho stvareńnia, a taksama pa vypłacie alimientaŭ.

Pa słovach ekśpiertaŭ, choć źmieny ŭ struktury kampanij stali bačnyja hetym letam, rychtavać stvareńnie siamiejnaha fondu Sachaščyki musili značna raniej. U Polščy takija fondy rehistruje tolki adzin Akruhovy sud. Praź vialikuju kolkaść zajavak praces zajmaje kala 12—14 miesiacaŭ. Tamu ciapierašnija źmieny, chutčej za ŭsio, vynik rearhanizacyi, raspačataj jašče letaś.

Kamientary da artykuła