U Polščy skaraciłasia kolkaść kampanij ź biełaruskimi karaniami
U Polščy dziejničajuć 7093 kampanii, u jakich adnym z akcyjanieraŭ (abo kančatkovych bienieficyjaraŭ) źjaŭlajecca biełaruskaja firma ci hramadzianin Biełarusi. Takija danyja pa stanie na 9 studzienia 2026 hoda pryvodzić Centr ekanamičnaj infarmacyi, piša Most.
U paraŭnańni sa studzieniem minułaha hoda kolkaść dziejnych firmaŭ ź biełaruskimi karaniami źniziłasia amal na 6%. Kampanii praciahvajuć rehistravać: ź dziejnych arhanizacyj 873 źjavilisia ŭ 2025 hodzie. Źnižeńnie ž kolkaści kampanij moža tłumačycca prypynieńniem dziejnaści raniej zarehistravanych firmaŭ abo vychadam sa składu zasnavalnikaŭ biełaruskich udzielnikaŭ.
Bolš za ŭsio firmaŭ ź biełaruskimi karaniami pracuje ŭ Mazavieckim vajavodstvie (3860), u tym liku 3361 — u Varšavie. Dalej tradycyjna iduć prymiežnyja rehijony: Padlašskaje vajavodstva (805 kampanij, ź jakich 723 zarehistravanyja ŭ Biełastoku) i Lublinskaje vajavodstva (465 firmaŭ, ź jakich tolki 89 dziejničaje ŭ Lublinie, a 300 — u Biała-Padlascy, prymiežnym horadzie, dzie rehistrujecca šmat kampanij-pieravozčykaŭ). Taksama biełaruski biznes aktyŭny ŭ Nižniaj Silezii (461 kampanija, u tym liku 401 — va Urocłavie) i na Pamorji (426 kampanij, ź jakich 325 — u Hdańsku).
Bolšaść kampanij pracuje ŭ śfiery hruzapieravozak — 960, ale heta na 13% mienš, čym u studzieni minułaha hoda. Bujnymi halinami taksama źjaŭlajucca prahramnaje zabieśpiačeńnie (399, ale źviartaje na siabie ŭvahu 9%-naje źnižeńnie ŭ paraŭnańni z pačatkam 2025 hoda), budaŭnictva žyłych i niežyłych budynkaŭ (342, abo na 22% mienš, čym hodam raniej).
Siarod biełaruskich arhanizacyj lidaram pa abjomie vyručki stała transpartna-łahistyčnaja kampanija TELS Global Polska. Dalej iduć kampanii z toj ža śfiery TI Group i Rezon Trans.
U Top-20 uvajšli taksama niekalki kampanij z IT-haliny: Innowise, Vention Development, 314Devs, Kaseya Poland, IBA Poland, PandaDoc Poland.
Zamykaje Top-20 kampanija Sahaty, jakaja zajmajecca budaŭnictvam i deviełapmientam. Jaje saŭładalnik — były pradstaŭnik Abjadnanaha pierachodnaha kabinieta pa pytańniach nacyjanalnaj biaśpieki Valeryj Sachaščyk.
U paraŭnańni z 2025 hodam śpis lidaraŭ pakinuŭ naftatrejdar Beloil Polska, jaki trapiŭ pad sankcyi. Kampanija Polcarbotrans, jakaja zajmajecca impartam i realizacyjaj vuhalu, zastałasia ŭ śpisie lidaraŭ, ale źniziła pazicyi.
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ3
Kamientary