ZŠA viernuć Biełarusi hrošy, zamarožanyja ŭ Sicibanku
ZŠA płanujuć razmarozić i viarnuć Biełarusi kala 43—44 miljonaŭ dalaraŭ, jakija zatrymalisia na rachunku ŭ amierykanskim Citibank. Śpiecpasłańnik ZŠA pa Biełarusi Džon Koŭł zajaviŭ, što amierykanski bok pačuŭ prośbu Łukašenki viarnuć hetyja srodki i ŭžo źviarnuŭsia ŭ bank z adpaviednaj prośbaj.
Džon Koŭł. Fota: Yauhen Yerchak / Anadolu via Getty Images
«Hetyja hrošy pavinny być razmarožanyja i viernutyja. My źviarnulisia ŭ bank z prośbaj razmarozić ich. Ciapier vypracoŭvajem miechanizm taho, jak heta zrabić», — skazaŭ Koŭł padčas sustrečy z Łukašenkam.
Jon dadaŭ, što biełaruski bok atrymaje infarmacyju pra dalejšyja dziejańni, jak tolki ad banka pastupić kankretny adkaz.
Pra hetyja hrošy 11 vieraśnia raskazaŭ Alaksandr Łukašenka. Pavodle jaho słoŭ, heta srodki, jakija zapłaciła kampanija, što supracoŭničała ź Biełaruśsiu.
15 vieraśnia ŭ Minsku prachodziać biełaruska-amierykanskija pieramovy. Łukašenka sustrakajecca z pradstaŭnikami kamandy prezidenta ZŠA Donalda Trampa. Amierykanskuju delehacyju ŭznačalvaje śpiecpasłańnik Džon Koŭł.