«Yes, soon!» Byłaja palitźniavolenaja raskazała pra słovy, ź jakimi lahčej vyžyvać u kałonii

Hetuju historyju błohieru Iharu Łosiku ŭčora raskazała dziaŭčyna, jakuju vyzvalili 16 vieraśnia.

Džon Koŭł. Fota: Yauhen Yerchak / Anadolu via Getty Images

Paśla pieršaha bujnoha vyzvaleńnia palitviaźniaŭ hod tamu dziaŭčaty ŭ žanočaj kałonii ŭ Homieli pačali žyć nadziejaj. U śniežni vyzvalili Maryju Kaleśnikavu i inšych dziaŭčat. U sakaviku — jašče adnu partyju.

Usie na łahiery žyli hetaj matematykaj: Koŭł pryjazdžaje pryblizna raz na try miesiacy. Značyć, chutka i my. Słova «Koŭł» stała ŭ kałonii amal mahičnym. Lubaja navina, list, čutka — aby tam było proźvišča Koŭł.

Adnojčy kamuści ŭ liście napisali, što Džon Koŭł u mai prylacić u Biełaruś i źbiare 1000 čałaviek na pratestancki fiestyval. Dziaŭčaty pačali dumać: «Tysiača čałaviek? Heta ž, napeŭna, zašyfravanaje paviedamleńnie. Koŭł źbirajecca vyzvalić tysiaču palitviaźniaŭ!»

A potym pa televizary ŭbačyli, što ŭ Minsku sapraŭdy sabralisia tysiačy viernikaŭ, Franklin Hrem i žonka Koŭła. Akazałasia, usio było litaralna, nijakaha šyfru. Sumna, ale nadzieja nikudy nie dziełasia.

Naviny ŭ łahier traplali roznymi šlachami — praź listy, razmovy, spatkańni.

I voś adnojčy chtości z voli prynios takuju čutku: Džona Koŭła zapytalisia ŭ tvitary, kali jon pryjedzie ŭ Minsk. Adkaz: Soon!

I tut pačałosia najcikaviejšaje. Što takoje soon? Praz try dni? Praz tydzień? Praź miesiac? Ci heta takoje amierykanskaje «chutka», jakoje moža aznačać uvohule što zaŭhodna?

A potym Koŭłu zadali jašče adno pytańnie: «Ci chutka vyjduć jašče palityčnyja źniavolenyja?» I jon adkazaŭ: Yes!

Usio. Hetaha było dastatkova. U žanočaj kałonii naradziŭsia svoj fłešmob.

— Kali pojdziem u biblijateku?

— Soon!

— Papješ sa mnoj kavy? — Yes!

— U ciabie budzie praciahłaje spatkańnie? Kali?

— Yes, soon!

Śmiajalisia. Žartavali. Tamu što časam u kałonii žart — heta prosta sposab nie varjacieć ad čakańnia. Dziaŭčaty vyrašyli paśla vyzvaleńnia navat zrabić svoj mierč z Džonam Koŭłam i słovami yes, soon!

Na siońnia na Antoškina ŭ Homieli znachodziacca kala sta žančyn, pryznanych palityčnymi źniavolenymi. I jany praciahvajuć čakać. Łoviać litaralna kožnuju čutku, jakaja da ich dachodzić praź ścieny i kalučy drot. Kožnaje «chutka». Chutčej by hetaje «chutka» nadyšło.

Kamientary da artykuła