Da Łukašenki znoŭ pryjechała delehacyja z Pakistana

Alaksandr Łukašenka zajaviŭ, što Biełaruś i Pakistan pavinny bolš aktyŭna raźvivać ekanamičnyja adnosiny. Pra heta jon skazaŭ na sustrečy sa staršynioj Sienata Pakistana Saidam Jusufam Rezoj Hiłani, paviedamlaje BiełTA.

Fota: BiełTA

Pa słovach Łukašenki, pamiž kiraŭnictvam dźviuch krain skłalisia dobryja palityčnyja adnosiny, ale ekanamičnaje supracoŭnictva pakul nie adpaviadaje ich uzroŭniu. Jon nahadaŭ pra damoŭlenaść z premjer-ministram Pakistana Šachbazam Šaryfam istotna aktyvizavać ekanamičnyja suviazi ŭ hetym i nastupnym hadach.

Asobna Łukašenka adznačyŭ nieabchodnaść naładzić narmalny finansavy abmien i płaciežnuju infrastrukturu pamiž dźviuma krainami.

Pavodle jaho słoŭ, apošnim časam tavaraabarot pamiž Biełaruśsiu i Pakistanam źnižajecca, u tym liku praz prablemy z praviadzieńniem płaciažoŭ.

Łukašenka vykazaŭ spadziavańnie, što paśla vizitu pakistanskaj delehacyi hetyja pytańni ŭdasca vyrašyć, što dazvolić pašyryć handlova-ekanamičnaje supracoŭnictva.

Raniej biełaruskija ŭłady spadziavalisia, što Pakistan dapamoža raźviazać vostry kadravy kryzis. Tema supracoŭnictva ŭ hetaj halinie pamiž Biełaruśsiu i Pakistanam uźnikła paśla sustreč biełaruskich i pakistanskich čynoŭnikaŭ. U krasaviku 2025 hoda Alaksandr Łukašenka i premjer Pakistana Šachbaz Šaryf damovilisia raspracavać miechanizm pryjezdu ŭ Biełaruś pakistanskich rabočych. Abmiarkoŭvajecca mahčymaść pryniać u Biełarusi da 100—150 tysiač čałaviek, ale pakul što ni ŭ va što sapraŭdy surjoznaje i maštabnaje heta, jak vyhladaje, nie vyliłasia. Apošnim časam novyja nadziei ŭ hetaj spravie ŭłady stali ŭskładać na Uźbiekistan.

Kamientary da artykuła