Mikoła Dziadok vydaŭ knihu pra technałohii kontrrevalucyi

Były palitviazień Mikoła Dziadok paviedamiŭ u sacsietkach pra vychad svajoj knihi pad nazvaj «Technałohii kontrrevalucyi». Jahonaja ŭžo druhaja paśla vychadu z-za krataŭ kniha (pieršaja była pra hrodzienskuju turmu) vyjšła ŭ vydaviectvie «Kamunikat».

«Dziaržaŭny aparat zmoh pieramahčy ŭ 2020 hodzie ŭ značnaj stupieni tamu, što ludzi, jakija sutyknulisia z represiŭnym instrumientaryjem, ničoha pra jaho nie viedali. I byli nie tolki napužanyja hetym nieviadomym arsienałam, ale i nie viedali, što jamu supraćpastavić.

Ułada, jak bačym, prajaŭlajecca nie tolki ŭ dubinkach, jana prajaŭlajecca ŭ tym liku ŭ manapolii na viedy.

U hetaj knizie ja pastaraŭsia, nakolki moh roznabakova, razhladzieć usie mietady, srodki i padychody, jakimi aŭtarytarnaja dziaržava raspraŭlajecca z hramadzianskaj supolnaściu, pratestam i samaarhanizacyjaj. U adnajmiennym ese ja katałahizavaŭ i daŭ prykłady litaralna pa ŭsich elemientach hetaj razburalnaj pracy: ad katavańniaŭ da miedyjnych skandałaŭ. Ad adzinočnych kamier da raspaŭsiudu čutak. Bo va ŭsich u ich adna meta — zachavańnie kantrolu.

U joj jość jak bolš mastackija ese (naprykład, «Dziaržava-fierma» — mietafara ab tym, čamu Łukašenka nie źbirajecca sychodzić, navat kali 99% biełarusaŭ prahałasujuć suprać jaho), hetak i bolš daśledčyja, jak užo zhadanyja «Technałohii kontrrevalucyi» i ese «Siamiejnyja kaštoŭnaści i aŭtarytaryzm» — ab tym, ź jakoj metaj režym tak zaciata prapahanduje hetyja samyja siamiejnyja kaštoŭnaści (spojler: da siamji jak kaštoŭnaści im spravy niama).

Krychu asobna ad usich staić finalnaje ese: moj ščyry raspovied pra 15 hadoŭ supraćstajańnia z HUBAZiKam. Mnohaje z taho, što ja tam vykłaŭ, ja jašče nikoli i nidzie nie kazaŭ», — pradstaŭlaje svaju knihu aŭtar.

Nieŭzabavie płanujucca prezientacyi hetaj knihi: 24 kastryčnika ŭ Biełastoku, 25‑ha — u Varšavie, a 7 listapada — u niamieckim Bremienie. Śpis prezientacyj, jak abiacaje Mikoła Dziadok, budzie papaŭniacca.

Kamientary da artykuła