Zasnavalnika «Rybaria» vydvarać z Čarnahoryi. A zajechaŭ jon tudy praz Hiermaniju, niahledziačy na sankcyi ES

Zasnavalnik prakramloŭskaha telehram-kanała «Rybaŕ» Michaił Źvinčuk, jakoha zatrymali ŭ piatnicu ŭ Čarnahoryi, prylacieŭ na Bałkany ź niamieckaha horada Mieminhien, vyśvietliła baśnijskaje rasśledavalnickaje vydańnie Detektor (BIRN). Ničoha surjoznaha prapahandystu nie pahražaje — jaho prosta vydvarać, piša «Ahientstvo».

Michaił Źvinčuk

Jak vyśvietlili žurnalisty, 2 kastryčnika Źvinčuk prylacieŭ ź Mieminhiena ŭ Sarajeva. Pavodle infarmacyi Ministerstva zamiežnych spraŭ Hiermanii, u miascovym aeraporcie niama mižnarodnaj tranzitnaj zony, jakaja dazvalała b pierasadžvacca, nie ŭjazdžajučy ŭ Šenhienskuju prastoru. Takim čynam, Źvinčuk pavinien byŭ prajści pašpartny kantrol i znachodzicca na terytoryi Hiermanii, niahledziačy na sankcyi, uviedzienyja suprać jaho ŭ 2023 hodzie.

Paśla prybyćcia ŭ Sarajeva jon pravioŭ piać dzion u Bośnii i Hiercahavinie, dzie zapisaŭ videa pra vybary. 7 kastryčnika Źvinčuk adpraviŭsia ŭ Čarnahoryju praz suchaputny pamiežny pierachod Zupcy.

Padčas pajezdki jon analizavaŭ vyniki vybaraŭ 4 kastryčnika ŭ Respublicy Sierbskaj. Žurnalisty vyznačyli miescy zdymkaŭ: rajon Kozarska-Dubicy, nacyjanalny park «Kozara» i miemaryjał Donia-Hradzina.

Źvinčuk užo naviedvaŭ Bośniju padčas prezidenckich vybaraŭ u Respublicy Sierbskaj u listapadzie 2025 hoda. Tady jon zapisaŭ videa kala budynka ŭrada rehijona.

Respublika Sierbskaja ŭvachodzić u skład Bośnii i Hiercahaviny i padtrymlivaje ciesnyja adnosiny z Maskvoj. Lidar kiroŭnaj partyi rehijona Miłarad Dodzik rehularna sustrakajecca z Uładzimiram Pucinym i vystupaje suprać sankcyj u dačynieńni da Rasii. Pavodle słoŭ samoha Dodzika, da kanca vieraśnia jon sustrakaŭsia z rasijskim prezidentam 29 razoŭ. Apošniaja sustreča adbyłasia 29 vieraśnia ŭ Kramli — za piać dzion da vybaraŭ u Bośnii.

U Čarnahoryi pravaachoŭniki zatrymali piaciarych čałaviek z kamandy kanała «Rybaŕ», u tym liku jaho zasnavalnika Michaiła Źvinčuka. Pavodle paviedamleńniaŭ, jany nie chavali svajho znachodžańnia ŭ krainie: spynilisia ŭ piacizorkavym hateli, zahadzia padali zajaŭku na zdymki ŭ Cecinskim manastyry, jaki daŭno padtrymlivaje suviazi z Maskvoj, a sam Źvinčuk vychodziŭ u efir z Čarnahoryi.

Aficyjnych abvinavačańniaŭ zatrymanym pakul nie pradjavili. Z paviedamleńniaŭ ŚMI vynikaje, što ich padazrajuć u praviadzieńni hibrydnaj apieracyi. U prakramloŭskich vajennych telehram-kanałach užo źjaviłasia viersija, što zatrymańnie było častkaj zahadzia raspracavanaha płana.

Paśla prybyćcia ŭ Čarnahoryju Źvinčuk raskazaŭ, što pamiežnik pravieryŭ jaho rečy, ale zabyŭsia źvieryć jahonyja danyja z bazaj. Pavodle infarmacyi TASS, Ministerstva ŭnutranych spraŭ Čarnahoryi pryznała Źvinčuka i jaho spadarožnikaŭ pahrozaj nacyjanalnaj biaśpiecy krainy i maje namier ich vydvaryć.

Kamientary da artykuła