Rasijskich ahientaŭ z telehram-kanała «Rybaŕ» zaŭvažyli za praviadzieńniem zdymak u Jeŭropie. Paśla vykryćcia jany ŭciakli
Supracoŭniki kanała «Rybaŕ», jaki źviazvajuć z rasijskimi śpiecsłužbami, pravodziać zdymki ŭ krainach Jeŭrasajuza, vykarystoŭvajučy dla hetaha roznyja sposaby, kab nie raskryvać sapraŭdnuju metu svajoj dziejnaści. Heta raskryła češskaje vydańnie Seznam Zprávy.
Kanał źviazany z byłym supracoŭnikam pres-słužby Ministerstva abarony Rasii Michaiłam Źvinčukom, viadomym pad psieŭdanimam «Rybaŕ».
Češskija žurnalisty zdoleli vykryć ludziej, jakija pracujuć sa Źvinčukom. Jany pierakanali ich, što mohuć arhanizavać intervju z ekśpiertam pa pytańniach miedyjapiśmiennaści i dezynfarmacyi Bohumiłam Kartaŭsam. Raniej Kartaŭs atrymaŭ zaprašeńnie na takuju razmovu. U im havaryłasia, što rasijski analityčny centr «Rybaŕ» rychtuje dakumientalny sieryjał pra sučasnuju sacyjalna-palityčnuju i ekanamičnuju situacyju ŭ Jeŭropie.
Materyjał češskich rasśledavalnikaŭ pierakazvaje rasijski niezaležny telehram-kanał Astra.
Ekśpiertu paviedamili, što zdymki pravodziacca nie tolki ŭ Čechii, ale taksama ŭ Francyi, Bielhii, Aŭstryi, Vienhryi, Słavakii, Sierbii, Bośnii i Hiercahavinie. Pierad intervju Kartaŭs atrymaŭ śpis pytańniaŭ. U pryvatnaści, jaho źbiralisia raspytać pra rost padtrymki pravych i jeŭraskieptyčnych sił u Čechii, a taksama pra mahčymaść narmalizacyi adnosin z Rasijaj.
Pavodle infarmacyi češskich žurnalistaŭ, zapyt na intervju pachodziŭ ad rasijanina Barysa Dvorkina. Jaho nazyvajuć režysioram dakumientalnaha kino, jaki supracoŭničaje z fondam «Historyja Ajčyny». Hetym fondam kiruje kiraŭnik Słužby zamiežnaj raźviedki Rasii Siarhiej Naryškin.
Na sustreču z žurnalistami pryjechali karespandent Vital Čaščuchin i apieratar Ihar Dałmataŭ. Češskija žurnalisty zdoleli ich identyfikavać pa videazapisie sustrečy. Pavodle Seznam Zprávy, abodva majuć dakumienty, jakija dazvalajuć žyć u Jeŭrasajuzie. Čaščuchin raniej pracavaŭ z rasijskimi telekanałami «Iźviestija», «Piatyj kanał» i RIEN TV.
Kali ŭdzielniki zdymak zrazumieli, što sustreča była arhanizavanaja žurnalistami, jakija rasśledavali ich dziejnaść, jany paśpiešliva pakinuli miesca.
Pavodle infarmacyi češskaha vydańnia, pradstaŭniki rasijskaj prapahandy taksama sprabavali atrymać intervju ŭ deputata Jeŭraparłamienta Ivana Davida, češskaha ekśpierta pa pytańniach enierhietyki Uładzimira Štepana, byłoha kiraŭnika vajskovaj raźviedki Čechii Andara Šandara i słavackaha publicysta Sama Mareca.
Pry hetym za parušeńnie sankcyj, uviedzienych suprać Michaiła Źvinčuka i «Rybaria», udzielnikam zdymak u Čechii moža pahražać da vaśmi hadoŭ pazbaŭleńnia voli.
Sioleta ŭ lipieni Vialikabrytanija ŭviała sankcyi suprać kiraŭnictva i supracoŭnikaŭ Z-kanała «Rybaŕ», źviazanaha ź Ministerstvam abarony Rasii. U lutym ChatGPT zabłakavaŭ sietku, źviazanuju z hetym kanałam. Jaje aŭtary vykarystoŭvali štučny intelekt dla raspaŭsiudžvańnia kramloŭskich naratyvaŭ na mižnarodnuju aŭdytoryju. Vosieńniu 2024 hoda ŭłady ZŠA abviaścili ŭznaharodu da 10 miljonaŭ dalaraŭ za infarmacyju pra Telegram-kanał «Rybaŕ».
Žanočy forum z Chakamadaj u Minsku pieranieśli. A jaje imia źnikła z anonsaŭ
Kolki Kreml płacić prapahandystam i vajenkaram, jakija ahitujuć ludziej za vajnu
Hałoŭnaha rasijskaha prapahandysta Dźmitryja Kisialova adchilili ad efiru «Viestiej niedieli»
Z Francyi vysyłajuć rasijskuju prapahandystku
Chto taki Z-błohier Illa Ramiasło, jakoha zatrymali za «fejki» pra rasijskuju armiju?
Kamientary
- A vy na eŭropy hetyja pahladzicie?"
😁 Musić, tak treba heta razumieć.