U Estonii sudziać biełaruskaha mianiału — za try miesiacy praź jaho prakrucili 861 tysiaču jeŭra

Prakuratura Estonii pieradała ŭ sud spravu 47‑hadovaha hramadzianina Biełarusi, jakoha abvinavačvajuć u nieadnarazovym admyvańni hrošaj u asabliva bujnym pamiery ŭ składzie hrupy. Za try miesiacy jon pravioŭ apieracyi z najaŭnymi hrašyma i kryptavalutaj na sumu bolš jak 861 tysiača jeŭra, piša vydańnie err.ee.

Stalica Estonii Talin. Zdymak ilustracyjny. Fota: «Naša Niva»

Pavodle abvinavačańnia, mužčyna ŭvachodziŭ u hrupu, jakaja z sakavika da červienia 2026 hoda dziejničała ŭ Estonii i vykonvała pasłuhi admyvańnia hrošaj. Jaje ŭdzielniki pieravodzili hatoŭku ŭ kryptavalutu i naadvarot, kab schavać sapraŭdnaje pachodžańnie srodkaŭ i asobu ich uładalnika. Padčas dasudovaha rasśledavańnia vyśvietliłasia, što takimi pasłuhami karystaŭsia čałaviek, asudžany za złačynstva, źviazanaje z narkotykami.

Dla arhanizacyi apieracyj vykarystoŭvali zašyfravanyja prahramy dla razmoŭ i roznyja ŭlikovyja zapisy. Udzielniki ździełak karystalisia psieŭdanimami i pry pieradačy hatoŭki nie nazyvali adzin adnamu svaich imionaŭ i nie praviarali dakumienty. Kab paznavać adzin adnaho, jany vykarystoŭvali tak zvanuju sistemu tokienaŭ: zahadzia praź miesiendžar pieradavali numar banknoty, pa jakim potym vyznačali ŭdzielnika sustrečy.

Pavodle materyjałaŭ śledstva, abvinavačany nie tolki arhanizoŭvaŭ ździełki, ale i sam udzielničaŭ u ich praviadzieńni. Jon damaŭlaŭsia z klijentami pra čas i miesca pieradačy abo atrymańnia hrošaj, a taksama arhanizoŭvaŭ apieracyi, jakija vykonvali inšyja kurjery. Paśla paćviardžeńnia pieradačy hatoŭki adpaviednuju sumu ŭ kryptavalucie pieravodzili na kryptakašalok klijenta abo, naadvarot, prymali ad jaho kryptavalutu.

Mužčynu zatrymali 13 červienia 2026 hoda. U toj ža dzień sud pa chadajnictvie prakuratury ŭziaŭ jaho pad vartu. U paniadziełak, 12 kastryčnika, sud pastanaviŭ padoŭžyć termin utrymańnia pad vartaj.

Kamientary da artykuła