U Francyi zatrymali furu z bujnym hruzam «viasiołaha hazu». Za rulom byŭ biełarus
U francuzskim rehijonie Aksitanija mytniki kanfiskavali amal 30 ton zakisu azotu, viadomaha jak «viasioły haz». Heta adna z najbujniejšych kanfiskacyj takoha rečyva ŭ Francyi, paviedamlaje sajt «Biełaruś i mir».
14 vieraśnia na punkcie zboru płaty za prajezd Mantaban-Nor u departamiencie Tarn i Harona francuzskija mytniki spynili hruzavik litoŭskaj kampanii, jaki jechaŭ z Barsiełony ŭ Paryž. Za rulom znachodziŭsia 32‑hadovy hramadzianin Biełarusi.
Padčas pravierki ŭ hruzaviku znajšli niezvyčajny hruz — kala 13 ton bałonaŭ z zakisam azotu. Jany byli raźmieščanyja na 14 paletach, abciahnutych termaŭsadžvalnaj plonkaj.
Praciah rasśledavańnia pryvioŭ pravaachoŭnikaŭ na skład u ŁJIl-Žurdenie ŭ departamiencie Žer. Tam znajšli jašče kala 17 ton zakisu azotu, raźmieščanych na 18 paletach.
U vyniku było kanfiskavana kala 6000 bałonaŭ ahulnaj vahoj 29 ton. Košt hruzu acanili prykładna ŭ 665 tysiač jeŭra.
Biełaruskaha kiroŭcu zatrymali, dastavili ŭ sud u Bardo i ŭziali pad vartu. Suprać jaho raspačali raźbiralnictva. Śledstva miarkuje, što mužčyna moh być tolki častkaj bolšaj schiemy, jakoj zajmałasia hrupa ludziej.
Siarod vystaŭlenych abvinavačańniaŭ — udzieł u złačynnaj zmovie, niezakonnaja pieravozka rečyvaŭ, vykanańnie niezadekłaravanaj pracy i admyvańnie hrošaj. Śledčyja ciapier sprabujuć vyśvietlić strukturu, jakaja stajała za maštabnym uvozam zakisu azotu, a taksama vyznačyć arhanizataraŭ i inšych udzielnikaŭ schiemy.
Paviedamlajecca, što ŭ lutym 2026 hoda ŭ Narbonie ŭ tym ža rehijonie francuzskija pravaachoŭniki ŭžo zatrymlivali litoŭski hruzavik ź biełaruskim kiroŭcam. Tady ŭ im znajšli kala 7,2 tony zakisu azotu.
Zakis azotu lehalna vykarystoŭvajecca ŭ miedycynie i charčovaj pramysłovaści, adnak prodaž rečyva pryvatnym asobam u mnohich krainach abmiežavany abo zabaronieny. Niekantralavanaje ŭdychańnie moža pryvieści da parušeńnia sardečnaha rytmu, abciažarvańnia dychańnia, parušeńnia krovazvarotu, taksičnaha apjanieńnia, aśfiksii i śmierci.
U Francyi ŭ apošnija hady šyrokaje nielehalnaje ŭžyvańnie «viasiołaha hazu», asabliva siarod padletkaŭ, stała surjoznaj prablemaj. Prodaž zakisu azotu fizičnym asobam tam užo abmiežavany. Z 1 lutaha 2027 hoda jaho prodaž płanujuć całkam zabaranić, a za ŭdychańnie rečyva budzie praduhledžvacca pakarańnie ŭ vyhladzie pazbaŭleńnia voli na termin da adnaho hoda.
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam
ES razhladaje abmiežavańni na vykarystańnie sacyjalnych sietak dziećmi
Ślady na staražytnych zubach istotna adsunuli pačatak historyi ŭžyvańnia ludźmi narkatyčnych rečyvaŭ
Biełaruska jeździła pa Čarnahoryi adrazu pad piaćciu narkotykami
Ciapier čytajuć
Padpałkoŭnika z fakulteta vajskovaj raźviedki sudziać za «zdradu dziaržavie» pa spravie, jakaja vyhladaje palityčnaj. Što pra jaho viadoma?6
Kamientary