Eks-ministr unutranych spraŭ Turcyi pryznaŭ, što davaŭ aŭtamabil synu Łukašenki
Były kiraŭnik Ministerstva ŭnutranych spraŭ Turcyi Idrys Naim Šachin daŭ pakazańni ŭ sudzie Ankary pa spravie relihijnaha dziejača Alichana Kuryša i ruchu «Sulejmandžyłar». U jahonych pakazańniach zhadvajecca adzin z synoŭ Alaksandra Łukašenki, zaŭvažyła ŭ tureckaj presie vydańnie Reform.news.
Tureckija ŭłady abvinavačvajuć kiraŭnikoŭ hetaha ruchu ŭ stvareńni złačynnaj supolnaści, admyvańni hrošaj, machlarstvie i inšych finansavych parušeńniach. Pa spravie zatrymali dziasiatki čałaviek.
Šachin zajaviŭ, što pieradaŭ biełaruskaj delehacyi aŭtamabil Audi Q7, zarehistravany na jaho imia. Mašyna trapiła ŭ avaryju ŭ Bodrumie, paśla čaho, kab hości ź Biełarusi nie zastalisia biez transpartu, im dali inšy aŭtamabil.
Pavodle pakazańniaŭ Amiura Judžela, jaki zajmaŭsia arendaj mašyn i raźmiaščeńniem biełarusaŭ, hety aŭtamabil jon atrymaŭ u Stambule i pajechaŭ na im u Bodrum razam z adnym z synoŭ Łukašenki i jaho achoŭnikami. Z mašyny źniali probliskavy majačok, jaki pakinuli delehacyi. Paźniej aŭtamabil taksama trapiŭ u avaryju.
U spravie fihurujuć troje hramadzian Biełarusi z dypłamatyčnymi pašpartami. Jany prylacieli ŭ Turcyju 6 žniŭnia, a 22 žniŭnia vylecieli z Turcyi ŭ Minsk. Pavodle danych sistemy raspaznavańnia aŭtamabilnych numaroŭ, 21 žniŭnia jany znachodzilisia ŭ mašynie na maršrucie Hiuvierdžynlik — Torba, a paźniej u Bursie pierasieli ŭ inšy aŭtamabil.
Taksama paviedamlałasia, što biełarusy karystalisia dźviuma SIM-kartami, jakija niezadoŭha da hetaha byli zarehistravanyja na imia Amiura Judžela.
Padčas suda Šachina taksama spytali pra infarmacyju 2011 hoda pra mahčymy šantaž tureckich biznesmienaŭ z vykarystańniem dziaŭčat ź Biełarusi. Jon zajaviŭ, što takich źviestak nie maje, ale viedaje troch čałaviek, nazvanych u tym paviedamleńni mahčymymi ŭdzielnikami schiemy.
Ludzi z atačeńnia Łukašenki ŭžo nie pieršy hod adpačyvajuć u Bodrumie. Dla pajezdak tudy rehularna vykarystoŭvajecca ŭradavy biznes-džet EW-301PJ, jaki ŭ lipieni i žniŭni niekalki razoŭ lotaŭ pamiž Minskam i Bodrumam.
Kamientary
ispolzovanije hosudarstviennoho transporta v ličnych cielach, a načinałoś vsio s pojezdki łuki so "svoroj" na łyži v Avstriju v 2002h. I pošło... A oficialnaja zarpłata około 4,5 tysiači dołłarov.