U Jehipcie znajšli frahmienty vializnych statuj faraona Ramziesa II

U delcie Niła ŭ Jehipcie archieołahi znajšli frahmienty dźviuch vializnych statuj faraona Ramziesa II, jakija pieršapačatkova mahli dasiahać 8,5 mietra ŭ vyšyniu. Pra znachodki paviedamiła Ministerstva turyzmu i staražytnaściaŭ Jehipta.

Fota: facebook.com/tourismandantiq

Adkryćcio adbyłosia ŭ pasieliščy Biechbiejt-el-Chahar. Miascovy žychar znajšoŭ kamień sa staražytnym nadpisam i paviedamiŭ pra jaho śpiecyjalistam. Paśla hetaha archieołahi praviali achoŭna-vyratavalnyja raskopki, padčas jakich znajšli šmat staražytnych artefaktaŭ.

Fota: facebook.com/tourismandantiq

Siarod najbolš značnych znachodak — frahmienty dźviuch manumientalnych statuj Ramziesa II, jaki kiravaŭ Jehiptam pryblizna ŭ 1279—1213 hadach da našaj ery i byŭ trecim faraonam XIX dynastyi.

Fota: facebook.com/tourismandantiq

Adzin z frahmientaŭ — masiŭnaja kamiennaja hałava vyšynioj kala 1,6 mietra. Na joj faraon namalavany ŭ pšencie — padvojnaj karonie, jakaja simvalizavała abjadnańnie Vierchniaha i Nižniaha Jehipta.

Na inšym bujnym frahmiencie daśledčyki znajšli nadpis z tak zvanym imieniem Hora. Jon dazvoliŭ vyznačyć, što statuja taksama była pryśviečanaja Ramzesu II. Zachavanaja častka druhoj statui maje kala 2,4 mietra ŭ vyšyniu. Na joj dobra bačny tvar faraona, jaki nosić carskuju hałaŭnuju chustku — niemies.

Fota: facebook.com/tourismandantiq

Pablizu archieołahi taksama znajšli błok z ružovaha hranitu, na jakim zachavalisia ijerohlifičnyja nadpisy z carskimi tytułami Ramziesa II.

Kamientary da artykuła