Sučasnyja mietady sudovaj ekśpiertyzy pakazali: pieršyja cary Jehipta mahli adpraŭlacca ŭ zamahilny śviet nie adny

U 1920‑ia hady viadomy brytanski jehiptołah Flinders Pitry pravodziŭ raskopki ŭ staražytnym Abidasie vakoł mahilnych kompleksaŭ pieršych kiraŭnikoŭ Jehipta, jakija vaładaryli pryblizna ŭ 3078—2900 hadach da našaj ery. Pobač z carskimi hrabnicami jon vyjaviŭ sotni spadarožnych pachavańniaŭ. Pakolki ŭsie jany byli začynienyja adnačasova i ŭ vidavočnaj śpiešcy, archieołah vykazaŭ zdahadku, što hetych ludziej prynieśli ŭ achviaru adrazu paśla śmierci manarcha.

Adnak u toj čas Pitry nie mieŭ instrumientaŭ, kab vyśvietlić dakładnuju pryčynu ich hibieli. Adsutnaść dokazaŭ hvałtoŭnaj śmierci na doŭhija dziesiacihodździ pakinuła viersiju pra rytualnyja zabojstvy na ŭzroŭni niedakazanaj hipotezy.

Ślady hvałtu na staražytnych čarapach

Jak piša Science Alert, kropku ŭ hetaj sprečcy pastaviła amierykanskaja daśledčyca Rozelin Kempbeł (Roselyn Campbell) z Univiersiteta imia Džona Pierdju. Jana paŭtorna daśledavała kalekcyju z 46 čarapoŭ, jakija Pitry vyviez u Anhliju, vykarystaŭšy sučasnyja sudova-miedycynskija mietady analizu. Vyniki pakazali, što na 18 ź ich prysutničajuć vyraznyja ślady śmiarotnych pryžyćciovych traŭmaŭ.

U bolšaści vypadkaŭ ekśpiertyza zafiksavała liniejnyja pierałomy čerapa, charakternyja dla ŭdaraŭ płoskimi i šyrokimi pradmietami. Na niekatorych pareštkach taksama vyjavili ślady pranikalnych ranieńniaŭ vostraj zbrojaj u bakavuju častku hałavy i traŭmy ad mocnaha siakučaha ŭdaru ŭ vobłaści voka.

Kempbeł nie vyklučaje, što častka pachavanych pamierła naturalnaj śmierciu. Adnak charaktar paškodžańniaŭ śviedčyć ab tym, što mnohija ludzi zahinuli ad naŭmysnych i mahutnych udaraŭ niepasredna pierad pachavańniem.

Słuhi i čynoŭniki na słužbie ŭ viečnaści

Analiz pachavańniaŭ pakazvaje, što achviarami stanavilisia nie vypadkovyja ludzi, a pradstaŭniki dvara roznaha statusu: ad ramieśnikaŭ da čynoŭnikaŭ nižejšaha i siaredniaha ranhu, čyje imiony i tytuły byli paznačanyja na mahiłach. Ich chavali ŭ prostych kamierach, kładučy pobač kieramičnyja sasudy, miednyja pryłady abo nievialikija fihurki sa słanovaj kości.

Historyki miarkujuć, što hety zvyčaj hruntavaŭsia na viery ŭ abaviazkovuju słužbu svajmu manarchu i ŭ inšym śviecie. Pry hetym adny prydvornyja mahli iści na śmierć dobraachvotna dziela honaru i viečnaha žyćcia pobač z carom, a inšych mahli prymušać.

Sama Rozelin Kempbeł adznačaje, što pry najaŭnaści nieabchodnych resursaŭ chacieła b adšukać i vyvučyć astatnija pareštki hetych ludziej, bo Pitry zachavaŭ i vyviez u Anhliju tolki ich čarapy. Tym nie mienš, jaje praca jaskrava pakazvaje, jak šmat novaha pra minułaje možna daviedacca, kali pierahledzieć raniej sabranyja archieałahičnyja danyja z dapamohaj sučasnych navukovych mietadaŭ, navat kali hetyja materyjały zastajucca niapoŭnymi i niedaskanałymi.

• 1
• 0
• 0
• 1
• 0
• 0
• 0
• 0