U Ńju-Jorku adśviatkavali 60-ja ŭhodki Fundacyi Kračeŭskaha
26 kastryčnika biełarusy Ńju-Jorku adśviatkavali 60-ja ŭhodki Biełaruskaj fundacyi Kračeŭskaha. Hetaja arhanizacyja była zasnavanaja z metaj zboru, zachavańnia i vyvučeńnia dakumientalnych śviedčańniaŭ pra dziejnaść biełarusaŭ u emihracyi, a taksama finansavaj i infarmacyjnaj padtrymki prajektaŭ, skiravanych na raźvićcio i papularyzacyju biełaruščyny.
U śviatkavańni brali ŭdzieł siabry fundacyi i zaprošanyja hości. Na pačatku śviatočnaha pasiedžańnia z pryvitalnym słovam vystupiła staršynia Rady dyrektaroŭ Halina Tumaš. Z apoviedam pra historyju zasnavańnia arhanizacyi i pieršych achviaradaŭcaŭ vystupili doktar Janka Zaprudnik — adzin z tych, chto stajaŭ la jaje vytokaŭ, i Valancina Tryhubovič, siabra Rady dyrektaroŭ i archivist fundacyi.
Doktar Vitaŭt Kipiel, dyrektar Biełaruskaha instytuta navuki i mastactva, padzialiŭsia ŭspaminami pra doktara Vitaŭta Tumaša, pieršaha staršyniu Rady dyrektaroŭ fundacyi. Pra dziejnaść arhanizacyi na praciahu apošniaha dziesiacihodździa prysutnych painfarmavaŭ Viačka Stankievič, jaki byŭ staršyniom Rady dyrektaroŭ u hety čas.
Vinšavańni z nahody jubileju dasłali Staršynia Rady BNR Ivonka Surviła, Biełaruski PEN-centr, Biełaruski dziaržaŭny archiŭ-muziej litaratury i mastactva, Radyjo Svaboda i inšyja.Haściej taksama čakali smačny pačastunak, dabračynnaja łatareja dy ščyryja siabroŭskija razmovy.
Kamientary