Nazvali samyja strašnyja filmy žachaŭ

U Chełaŭin amatary filmaŭ žachaŭ znoŭ šukajuć, čym siabie napałochać. Ale husty va ŭsich roznyja: toje, što adnaho hledača prymušaje zapluščyć vočy, inšaha moža tolki raśśmiašyć. Ci možna ŭ takim razie vyznačyć, jaki film sapraŭdy samy strašny?

Adkaz na hetaje pytańnie ŭžo siomy hod šukajuć aŭtary prajekta Science of Scare. Zamiest taho kab prosta apytvać hledačoŭ pra ich uražańni, jany vymiarajuć fizijałahičnuju reakcyju arhanizma padčas prahladu choraraŭ, piša Euronews.

U daśledavańni ŭdzielničajuć sotni dobraachvotnikaŭ. Jany hladziać anhłamoŭnyja filmy žachaŭ z datčykami, jakija fiksujuć častatu sardečnych skaračeńniaŭ.

Adnak adnaho tolki pulsu dla acenki niedastatkova. Daśledčyki ŭličvajuć taksama varyjabielnaść sardečnaha rytmu — toje, jak źmianiajucca intervały pamiž udarami serca. Akramia taho, jany źviartajuć uvahu na maksimalny puls, zafiksavany ŭ najbolš napružanyja momanty.

Na asnovie hetych pakazčykaŭ kožnamu filmu prysvojvajuć adznaku pavodle śpiecyjalnaha indeksa strachu (Scare Score) pa škale ad 0 da 100 bałaŭ.

Jaki film akazaŭsia samym strašnym

Sioleta ŭ daśledavańnie ŭklučyli 15 novych filmaŭ žachaŭ. Samym strašnym siarod ich staŭ «Paŭton» (Undertone) — historyja viadučaj padkasta pra zvyšnaturalnyja źjavy, jakaja atrymlivaje zahadkavyja aŭdyjazapisy i nieŭzabavie sama sutykajecca ź nievytłumačalnymi padziejami. U ahulnym rejtynhu jon zaniaŭ 33‑ie miesca.

A lidaram užo čaćviorty hod zapar zastajecca «Sinister» (Sinister) — film žachaŭ režysiora Skota Deryksana, jaki vyjšaŭ na ekrany ŭ 2012 hodzie. Jon raskazvaje pra piśmieńnika, jaki pierajazdžaje ź siamjoj u dom, dzie adbyłosia žorstkaje zabojstva, i znachodzić staryja kinaplonki z zapisami inšych złačynstvaŭ.

Padčas jaho prahladu siaredni puls udzielnikaŭ pavialičyŭsia na 34% — z 64 da 86 udaraŭ za chvilinu, a ŭ samy strašny momant dasiahaŭ 131 udaru. Pavodle sukupnaści pakazčykaŭ «Sinister» nabraŭ 96 bałaŭ sa 100 mahčymych i znoŭ byŭ pryznany samym strašnym filmam žachaŭ.

Adnak kali b rejtynh składali tolki pavodle maksimalnaj častaty pulsu, pieramožcam staŭ by «Prystanak zła» (Resident Evil) režysiora Zaka Krehiera. Padčas adnoj sa scen puls hledačoŭ dasiahaŭ 134 udaraŭ za chvilinu. I heta bolš, čym padčas prahladu luboha inšaha filma ŭ historyi daśledavańnia.

Admietna, što ŭ pieršuju dvaccatku trapili vyklučna filmy XXI stahodździa. A voś u pašyranym rejtynhu jość i kłasika choraru minułaha stahodździa, u tym liku «Vyhanialnik djabła» (The Exorcist, 1973), «Techaskaja raźnia bienzapiłoj» (The Texas Chain Saw Massacre, 1974), «Chełaŭin» (Halloween, 1978), «Kašmar na vulicy Viazaŭ» (A Nightmare on Elm Street, 1984).

Top-20 samych strašnych filmaŭ žachaŭ pavodle Science of Scare

1. «Sinister» (Sinister, 2012)
2. «Astrał. Anłajn» (Host, 2020)
3. «Paranarmalnyja źjavy. Skinamarynk» (Skinamarink, 2022)
4. «Astrał» (Insidious, 2010)
5. «Zaklaćcie» (The Conjuring, 2013)
6. «Reinkarnacyja» (Hereditary, 2018)
7. «Uśmieška 2» (Smile 2, 2023)
8. «Uśmieška» (Smile, 2022)
9. «Šeść demanaŭ Emili Roŭz» (The Exorcism of Emily Rose, 2025)
10. «Dva, try, deman, pryjdzi!» (Talk to Me, 2022)
11. «Dom piekła» (Hell House LLC, 2015)
12. «Zaklaćcie 2» (The Conjuring 2, 2016)
13. «Jano prychodzić za taboj» (It Follows, 2014)
14. «Pustka ciemry i zła» (The Dark and the Wicked, 2020)
15. «Spusk» (The Descent, 2005)
16. «Paranarmalnaja źjava» (Paranormal Activity, 2007)
17. «Babaduk» (The Babadook, 2014)
18. «Cichaje miesca 2» (A Quiet Place 2, 2020)
19. «Deman unutry» (The Autopsy of Jane Doe, 2017)
20. «Astrał: Hłava 2» (Insidious 2, 2013)

Zrešty, navat taki rejtynh nie daje adnaznačnaha adkazu na pytańnie, jaki film samy strašny. Niečakany huk abo raptoŭnaje źjaŭleńnie pačvary mohuć vyklikać mocnuju reakcyju arhanizma. Ale heta nie abaviazkova aznačaje, što taki film napałochaje bolš, čym toj, jaki pastupova nahniataje tryvohu i nadoŭha zastajecca ŭ pamiaci.

Tamu, choć daśledavańnie i dazvalaje paraŭnać reakcyju hledačoŭ na roznyja filmy, u kožnaha čałavieka ŭsio roŭna moža być svoj samy strašny chorar.

Z poŭnym rejtynham možna aznajomicca tut.

• 7
• 1
• 3
• 1
• 2
• 0
• 1
• 0