Dziaržaŭny sakratar ZŠA Majkł Pampiea 1 lutaha sustreŭsia ź biełaruskimi pravaabaroncami padčas svajho vizitu ŭ Minsk.
Na sustrečy prysutničali Siarhiej Drazdoŭski z Ofisu pa pravach ludziej ź invalidnaściu, Alena Anisim z Tavarystva biełaruskaj movy, staršynia pravaabarončaha centra «Viasna» Aleś Bialacki i staršynia Biełaruskaha Chielsinkskaha Kamiteta Aleh Hułak, piša spring96.org.
Biełaruskija pravaabaroncy padniali najbolš važnyja i złabadzionnyja pytańni pa pravach čałavieka ŭ Biełarusi. U pryvatnaści, Siarhiej Drazdoŭski raspavioŭ pra prablemy, źviazanyja z vykanańniem sacyjalna-ekanamičnych pravoŭ, z adsutnaściu antydyskryminacyjnaha zakanadaŭstva i parušeńniem pravoŭ prafsajuzaŭ. Alena Anisim źviazała mahčymaść isnavańnia i aktyŭnaj pracy hramadskaj supolnaści z pytańniem niezaležnaści Biełarusi, adznačyła važnaść u hetaj situacyi biełaruskaj movy i kultury, raspaviała pra niadaŭnija demanstracyi ŭ padtrymku niezaležnaści.
Aleś Bialacki paviedamiŭ pra stabilna kiepskuju situacyju z hramadska-palityčnymi pravami. Adznačyŭ, što parušajucca pravy na svabodu schodaŭ i mitynhaŭ, u jakaści prykładu pryvioŭ apošnija mirnyja demanstracyi ŭ padtrymku niezaležnaści krainy, za ŭdzieł u jakich ułady pakarali dziasiatki ŭdzielnikaŭ. Pa acency pravaabaroncy, ułady nie hatovyja supracoŭničać z hramadzianskaj supolnaściu navat pa takich žyćciova važnych pytańniach dla Biełarusi, jak niezaležnaść.
Aleś Bialacki adznačyŭ, što parušajucca pravy palityčnych aktyvistaŭ, niezaležnych błohieraŭ i aktyvistaŭ:
«Na žal, u krainie adsutničajuć svabodnyja vybary. Ułada pryvatyzavanaja, niama niezaležnaj sudovaj sistemy, a zakanadaŭčaja ŭłada nie adpaviadaje realnym nastrojam u hramadstvie. Miljony biełarusaŭ padtrymlivajuć demakratyčnyja źmieny ŭ krainie. Ale represijami ŭłady stvarajuć vysoki ŭzrovień strachu».
Pravaabaronca źviarnuŭ uvahu i na toje, što pytańnie niezaležnaści Biełarusi mocna źviazana z kompleksnymi źmienami pa demakratyzacyi hramadska-palityčnaha žyćcia ŭ krainie, i vykazaŭ spadziavańnie, što ZŠA budzie spryjać stanoŭčym źmienam va ŭsim uschodnie-jeŭrapiejskim rehijonie, u pryvatnaści ŭ takich krainach, jak Ukraina, Małdova, Biełaruś.
Aleh Hułak u svaim vystupie adznačyŭ važnaść amierykanska-biełaruskaha dyjałohu pa pravach čałavieka i vykazaŭsia za bolš aktyŭnaje pryciahnieńnie hramadzianskaj supolnaści va ŭsie pieramoŭnyja pracesy pamiž ZŠA i Biełaruśsiu.
Majkł Pampiea prakamientavaŭ vystupy biełaruskich pravaabaroncaŭ, skazaŭ, što jość ahulnaje razumieńnie prablemaŭ, što jon padymaŭ najbolš važnyja pytańni pa pravach čałavieka ŭ Biełarusi na sustrečy z prezidentam A. Łukašenkam i ministram zamiežnych spraŭ U. Makiejem. Jon taksama padkreśliŭ, što pazicyja ZŠA pa padtrymcy demakratyi i pravoŭ čałavieka ŭ Biełarusi zastajecca niaźmiennaj.
Sustreča źjaviłasia vyraznym sihnałam urada ZŠA ŭ padtrymku hramadzianskaj supolnaści i demakratyčnych aktyvistaŭ u Biełarusi.
Ciapier čytajuć
«Ja nie śviataja, ale ŭ mianie nie było nadziejnaha plača pobač»: maci Ksiušy z SMA mohuć pazbavić baćkoŭskich pravoŭ, jana ž davodzić, što zdolnaja vypravicca13
Kamientary