Analiz: i Tramp, i Pucin adnolkava zacikaŭlenyja ŭ vysokich cenach na naftu

Prezident ZŠA Donald Tramp zajaviŭ, što raźličvaje na damoŭlenaść pamiž Rasijaj i Saudaŭskaj Aravijaj ab cenach na naftu. Pra heta piša Reuters.

Tramp spadziajecca, što krainy prydumajuć płan dziejańniaŭ na najbližejšyja dni. Pavodle jaho słoŭ, situacyja na rynku nafty vielmi drennaja jak dla Rasii, tak i dla Saudaŭskaj Aravii. «Ja dumaju, što jany pahodziacca», — reziumavaŭ jon.

Tramp taksama zaprasiŭ kiraŭnikoŭ naftavych kampanij ZŠA «abmierkavać prablemy na rynku i znajści šlachi ich vyrašeńnia».

Jašče 20 hadoŭ tamu ZŠA byli čystym imparcioram nafty z-za miažy. Adpaviedna, amierykanskija ŭłady byli zacikaŭlenyja, kab ceny na hetyja syravinu trymalisia na nizkim uzroŭni.

Usio źmianiłasia paśla raspracoŭki technałohii zdabyčy słancavaj nafty. U ZŠA vyjavili jaje vialikija zapasy, i kraina stała samadastatkovaj. Bolš za toje, amierykancy pačali zmahacca za ekspartnyja rynki. Ale adna tonkaść. Sabiekošt amierykanskaj słancavaj nafty našmat vyšejšy za sabiekošt rasijskaj syraviny ci, tym bolš, aravijskaj.

Adzinaj mietodyki padliku sabiekoštu nie isnuje, ale, zdajecca, ekanamičnaja metazhodnaść zdabyčy źnikaje ŭ Aravii prykładna pry cenach ad 10 dalaraŭ za baral, u Rasii — ad 15, a ŭ Techasie — ad 50. Cenavaja vajna Saudaŭskaj Aravii z Rasijaj, takim čynam, najbolš udaryła pa ZŠA, palityki jakoj zaležać u tym liku ad naftavych karparacyj.

Z adnaho boku, mnohija palityki-respublikancy tradycyjna źviazanyja z naftavym łobi. Ź inšaha boku, supiervysokija ceny na naftu taksama bjuć pa papularnaści ŭładaŭ, bo daražeje bienzin. Tamu administracyja Trampa, zdajecca, chacieła b cenaŭ nievysokich, ale stabilnych i na ŭzroŭni prybytkovaści amierykanskaj naftanki. Cana pad 60 za baral WTI, jakaja trymałasia davoli doŭhi čas, całkam naftavikoŭ ZŠA zadavalniała.

Krainy APIEK+ nie zmahli damovicca i praciahnuć pahadnieńnie ab skaračeńni zdabyčy nafty 6 sakavika. Dziejnaje pahadnieńnie pierastała dziejničać z 1 krasavika. Paśla hetaha ŭsie abmiežavańni na zdabyču nafty ŭ krainach APIEK i krainach, jakija nie ŭvachodziać u APIEK, buduć źniaty.

Dziaržaŭnaja Saudi Aramco prapanavała kupcam nafty samyja vialikija źnižki za apošnija 20 hadoŭ i abiacaje pavialičyć zdabyču bolš čym na 2 miljony baralaŭ u dzień.

U vyniku Biełaruś, naprykład, u krasaviku, jak zajaviŭ premjer-ministr krainy Rumas, budzie kuplać naftu pa cenach ad 4 dalaraŭ za baral.

Pres-sakratar Rasnafty Michaił Lavonćjeŭ zajaviŭ, što pahadnieńnie z Arhanizacyjaj krain-eksparcioraŭ nafty ab skaračeńni zdabyčy nafty nie adpaviadaje intaresam Rasii.

Havorka idzie nie pra karennyja supiarečnaści, a pra padzieł ekspartnych rynkaŭ. Adnak u cełym supadzieńnie intaresaŭ Rasii, ZŠA i Saudaŭskaj Aravii aznačaje, što z časam ceny na naftu vyrastuć nazad da davoli vysokaha ŭzroŭniu i ŭsie pryviazanyja da ich ceny (haz dy inšaja syravina) taksama. Tak budzie, pakul try hetyja dziaržavy buduć pradukavać asnoŭnuju častku suśvietnaj nafty i pakul soniečnaja enierhija nie zamianiła saboj vuhlevadarody ŭ dastatkovaj miery.

Tolki karanavirus mocna paciahnuŭ ceny ŭniz, bo pierastali lotać samaloty i abvaliłasia ekanamičnaja aktyŭnaść, ale paśla skančeńnia pandemii ceny znoŭ padskočać.

U Biełarusi ad kańjunktury cen na naftu zaležać popyt na pradukcyju ŭ Rasii, ceny na nieruchomaść. Časta i ceny na kalij paŭtarajuć kryvuju koštu nafty. Akramia taho, u pieryjady vysokich cen na naftu Rasija schilnaja vystaŭlać susiednim krainam bolš palityčnych pretenzij.

• 0
• 0
• 0
• 0
• 0
• 0
• 0
• 0