Ministr: Na siońnia ŭ Viciebsku kala tysiačy pacyjentaŭ ź pnieŭmanijaj
U horadzie Viciebsku na siońnia dyjahnastavana kala 1000 pnieŭmanij.
Pra heta ŭ adkaz na pytańnie «Našaj Nivy» paviedamiŭ ministr achovy zdaroŭja Biełarusi Uładzimir Karanik na pres-kanfierencyi ź misijaj SAAZ 11 krasavika.
Jon nie zmoh nazvać ahulnuju ličbu chvorych na pnieŭmaniju ŭ Viciebskaj vobłaści ŭ cełym i ŭ Dokšyckim rajonie, ale paabiacaŭ dać takuju infarmacyju ŭ vypadku piśmovaha zapytu pra jaje.
Zychodziačy sa statystyki pnieŭmanij možna sprajecyravać, choć i vielmi pryblizna, stupień raspaŭsiudžańnia «niedavyjaŭlenaj» karanavirusnaj infiekcyi. Z daśledavańniaŭ epidemijołahaŭ viadoma, što pnieŭmanija raźvivajecca prykładna ŭ 13—20% pacyjentaŭ, infikavanych karanavirusam.
Letaś pnieŭmanij na piku było kala 600, adznačyŭ ministr.
My možam dadać, što, u suviazi z tym, što zima i sakavik byli ciopłyja, a kolkaść vypadkaŭ hrypu i VRVI sioleta była niaznačnaj, naŭrad ci ličba «zvyčajnych» pnieŭmanij ciapier moža być pikavaj.
Voś videa pres-kanfierencyi:
U Biełarusi łabaratorna paćvierdžanaje zaražeńnie karanavirusam 301 miedrabotnika, taksama paviedamiŭ na pres-kanfierencyi ministr achovy zdaroŭja Biełarusi Uładzimir Karanik. Jon vyhladaŭ vielmi stomlenym, ale adkazvaŭ na pytańni žurnalistaŭ amal dźvie hadziny.
Bolšaść pytańniaŭ byli adrasavanyja biełaruskamu ministru, a nie pradstaŭnikam misii SAAZ, jakija adkazvali na pytańni ŭchilista. Pry ŭsioj dypłamatyčnaści apošnija ŭsio ž jasna dali zrazumieć, što rekamiendujuć Biełarusi ŭzmacnić zachady pa «raźjadnańni» ludziej i zabaranić usialakija masavyja mierapryjemstvy.
Kamientary