Miarkujučy pa pnieŭmanijach, kolkaść śmierciaŭ ad karanavirusa ŭ Pieciarburhu zanižana ŭ 10 razoŭ
Z 1 sakavika ŭ Pieciarburhu ad pazabalničnaj pnieŭmanii pamierli 694 čałavieki. Pra heta zajaviŭ hubiernatar Pieciarburha Alaksandr Biahłoŭ, vystupajučy 13 maja pierad deputatami Zakanadaŭčaha schodu, paviedamlaje «Novaja hazieta».
Pavodle jaho słoŭ z 1 sakavika ŭ horadzie pazabalničnuju pnieŭmaniju dyjahnastavali ŭ 11 223 čałaviek. Ź ich 694 pamierli, 5924 ačuniali, 4650 praciahvajuć lačycca. Hetyja chvoryja i pamierłyja nie ŭvachodziać u aficyjnuju statystyku pa karanavirusie, jakaja na takim fonie vyhladaje značna bolš biaskryŭdnaj: z pačatku epidemii pa stanie na 11 maja ŭ Pieciarburhu vyjaŭlena 8485 zaražeńniaŭ COVID-19, pamierła 63 čałavieki.
U pačatku 2020-ha karcina pa pnieŭmanijach była takoj: 1731 chvory ŭ studzieni (8 pamierłych), 1777 — u lutym (12 pamierłych). A potym adbyŭsia rezki skačok.
Raniej žurnalisty vyjavili, što śmiarotnaść u Maskvie pieravysiła siaredniuju za minułyja hady na 1800 čałaviek.
Z ulikam roźnicy ŭ pamiery nasielnictva hetych haradoŭ, heta daje prykładna adnolkavyja ličby rostu śmiarotnaści ŭ pieraliku na dušu nasielnictva.
Aficyjnyja ličby śmierciaŭ ad karanavirusa ŭ Rasii nižejšyja, čym u jeŭrapiejskich krainach, navat samych paśpiachovych u zmahańni z pandemijaj.
Z daśledavańniaŭ navukoŭcaŭ viadoma, što mienš čym u 20% chvorych na karanavirus raźvivajecca pnieŭmanija.
U adroźnieńnie ad mnohich inšych krain, Biełaruś i Rasija nie zaličvajuć chvorych na virusnyja pnieŭmanii ŭ statystyku zaražanych karanavirusam aŭtamatyčna. Miž tym tak robić, naprykład, Kitaj pačynajučy ad 12 lutaha. U Biełarusi, jak i ŭ Rasii, i karanavirusnyja, i niekaranavirusnyja pnieŭmanii lečać razam. Ale pry hetym pnieŭmanii nie zaličvajuć u statystyku karanavirusa i śmiarotnaści ad jaho.
Pa aficyjnych źviestkach, u Rasii ad COVID-19 pamierła bolš za 2400 čałaviek.
Kamientary