«Skazaŭ, što ŭ dziejańniach AMAPa nie było žorstkaści — i atrymaŭ u voka»: stalinist śćviardžaje, što jaho pabili za padtrymku Łukašenki
Mikałaj Vałovič — idejny stalinist, źjaŭlajecca druhim sakratarom KPB Savieckaha rajona Minska.
Na hetych vybarach jon, jak i ŭsia partyja kamunistaŭ, padtrymlivaŭ Alaksandra Łukašenku. Nie źmianiŭ Vałovič svajho staŭleńnia i paśla vybaraŭ. U vyniku ź im adbyŭsia nie samy pryjemny incydent.
U razmovie z žurnalistam «NN» Mikałaj Vałovič raskazaŭ, što ŭ noč na 23 žniŭnia pozna viartaŭsia dadomu. «Heta było prykładna a 0:00-0:10, vyjšaŭ z taksi nie zusim kala doma, a chacieŭ jašče trošku prahulacca, bo było dobraje nadvorje. Usio heta adbyvałasia ŭ dvarach na vulicy Prytyckaha».
Kamunist kaža, što na dziciačaj placoŭcy ŭ toj čas znachodziłasia hrupa z čatyroch maładzionaŭ, jany paklikali Vałoviča da siabie. «Stali pytacca, što ja dumaju pra dziejańni AMAPa, za kaho hałasavaŭ na vybarach. Ja ščyra adkazaŭ, što hałasavaŭ za Łukašenku, a ŭ dziejańniach AMAPa nie baču praźmiernaj žorstkaści. U hety momant na mianie stali kryčać «fašyst» i «sadyst». Adzin z prysutnych pavaliŭ mianie i prycisnuŭ kalenam horła, potym nanios udar u tvar», — raskazvaje Vałovič.
Pa jahonych słovach, hvałt suprać jaho prymianiaŭ tolki adzin chłopiec z kampanii. Vałovič napisaŭ zajavu ŭ milicyju, udzielnikaŭ incydentu pakul nie znajšli.
«Naŭrad ci niechta mianie metanakiravana čakaŭ, chutčej, heta adbyłosia vypadkova. Tak atrymałasia, što na toj momant nikoha pobač nie było. Kali ja ŭžo adtul syšoŭ, to nabraŭ 102. Milicyja pryjechała chutka, ale napadnikaŭ užo nie było na miescy.
Mnie zdajecca, što prapahanda, jakaja lijecca z telehram-kanała Niechta i telekanała «Biełsat», mocna adbiłasia na psichicy hetych ludziej», — razvažaje jon.
U vyniku ŭ Vałoviča krovapadciok voka, finhał, ranki, a taksama pahoršyŭsia zrok. «Było ciomna, dobra ja hetych ludziej nie zapomniŭ. Mahu skazać, što na ich było ciomnaje adzieńnie i rostam jany byli vyšej za mianie, dzieści 180 sm, mocnyja takija chłopcy», — kaža mužčyna.
Ciapier čytajuć
U 2020 hodzie jabaćka Amina «aktyŭna hałasavała» za Łukašenku. A ciapier nie razumieje, čamu rodnaja maci na jaje daniesła, a milicyja zatrymała18
Kamientary