Rumas z Łondana: Ja žyvy, nie aryštavany. Dziakuj, što chvalujeciesia
Užo chutka tydzień, jak stała viadoma pra zatrymańni siabroŭ byłoha premjer-ministra Siarhieja Rumasa, a taksama mierkavanyja pytańni orhanaŭ biaśpieki da jaho samoha.
Čytajcie: Stała viadoma, dzie znachodzicca Siarhiej Rumas i ŭ čym sens pretenzij da jaho
Z taho času ŭ publičnaj prastory Rumas nie źjaŭlaŭsia. Pa infarmacyi «Našaj Nivy», jon znachodzicca ŭ Brytanii, kudy palacieŭ na dzień narodzinaŭ starejšaha syna Valeryja napiaredadni kampanii aryštaŭ, jakaja zakranuła koła siabroŭ byłoha premjera.
Valeryj Rumas zajmaje pasadu pamočnika dyrektara ŭ łondanskim filijale rasijskaj inviestycyjnaj kampanii VTB Capital.
Sam eks-premjer usie hetyja dni nie adkazvaŭ na pytańni. Za jaho havaryła žonka Žanna, jakaja zapeŭniła karespandentaŭ roznych vydańniaŭ, što muž znachodzicca na voli.
8 lutaha da Siarhieja Rumasa dazvaniŭsia karespandent «Našaj Nivy», toj adkazaŭ na vyklik.
«Ja nie budu davać nijakich kamientaroŭ, vybačajcie. Vy pačuli, što ja žyvy, nie aryštavany, ale ničoha kamientavać nie budu. Dziakuj, što chvalujeciesia», — adkazaŭ Siarhiej Rumas.
Naziralniki zadajucca pytańniem, jakija buduć dalejšyja kroki byłoha premjera. Siarhiej Rumas ź jaho suviaziami ŭ siłavych strukturach i čynoŭnickim aparacie byŭ by zdolny nie prosta ŭzmacnić apazicyju, ale i stać i jaje lidaram.
Śviatłana Cichanoŭskaja, jakaja stała simvałam ruchu za hramadzianskija pravy i svabodnyja vybary, nie raz paŭtarała, što nie choča ŭznačalvać krainu paśla źmieny sistemy i vyzvaleńnia svajho palitźniavolenaha muža. U toj ža čas sacyjołahi adznačali zapyt u hramadstvie na «abjadnaŭčaha lidara» z vopytam kiravańnia i prymalnaha dla samych roznych słajoŭ.
51-hadovy Siarhiej Rumas pracavaŭ jak u finansavaj śfiery, tak i va ŭradzie. Ën taksama razumieje siłavyja struktury, bo sam skončyŭ vajskova-finansavaje vučylišča.
U Rumasa čatyry syny, dva starejšyja ź ich pracujuć u krainach Jeŭrasajuza.
Viadoma, što Rumas z žonkaj adzin ź dzion tydnia doma razmaŭlali pa-biełarusku, kab zachavać umieńnie havaryć na rodnaj movie.
U 2010—2012 Siarhiej Rumas byŭ vice-premjeram i ŭ hetaj jakaści procistajaŭ prychilnikam savieckich mietadaŭ u ekanomicy. U 2018—2020 jak premjer kiravaŭ ekanomikaj va ŭmovach piermanientnaha kryzisu, vyklikanaha nastupstvami valuntaryzmu i niekampietentnaści ŭ viarchach i zastojem ekanomiki ŭ Rasii, hałoŭnym handlovym partnioru Biełarusi. Niahledziačy na hetyja składanyja ŭmovy, urad Rumasa zabiaśpiečyŭ finansavuju i makraekanamičnuju stabilnaść. Siarod inšaha, Siarhiej Rumas vioŭ składanyja pieramovy z Maskvoj ab pastaŭkach enierhanośbitaŭ.
***
Kamientary